Publicado en Curiosidaes, NATURA

Reparen un pulpu tresparente: los sos órganos vense a güeyu

Sábese qu’esta criatura esiste dende 1918 pero ye bien torna porque nada a gran fondura nel océanu. Esti pulpu de cristal foi captáu por un robot submarín que lu filmó alzándose con gracia al traviés de les fondes agües del océanu Pacíficu Central.

La increíble criatura, que los sos órganos internos son visibles al traviés del so cuerpu a güeyu, foi columbrada dos vegaes pola espedición abargana del archipiélagu de les Isles Fénix a lo llargo d’una espedición que duró 34 díes. El so mantu puede algamar hasta 11 centímetros de llargu y el so cuerpu total puede algamar hasta 45 centímetros n’adultos. Los sos güeyos son de forma casi rectangular y les criatures d’agües fondes tienen embriones que se desenvuelven dientro de los güevos que permanecen nel cuerpu de la fema hasta que tán llistos para nacer.

Conocida como Vitreledonella richardi, sábese qu’esta especie de cefalópodu esiste dende 1918. Sicasí, escasamente púdose grabar o fotografiar por cuenta de los niveles estremos nos que nada; d’ende qu’esti fascinante vídeu tenga un gran valor académicu.

Al igual qu’otres criatures de «cristal», como les xaronques de cristal y ciertes aguamales de peñe, los pulpos de cristal son casi dafechu tresparentes, y solo los sos güeyos cilíndricos, el nerviu ópticu y el tractu dixestivu apaecen opacos.

Sábese pocu sobro estos cefalópodos, sacante que viven n’árees tropicales y subtropicales nes fondures del océanu de 200 a 1000 metros per debaxo de la superficie y de 1000 a 3000 metros so la superficie, según la Unión Internacional pal Caltenimientu de la Naturaleza (UICN).


La Xunión Internacional pal Caltenimientu de la Natura (UICN, n’inglés: IUCN) ye una organización internacional dedicada al caltenimientu de los recursos naturales.

Fundóse n’ochobre de 1948, nel marcu d’una conferencia internacional celebrada en Fontainebleau, Francia. Tien la so sede en Gland, Suiza. La UICN ye la organización medioambiental más antigua y más grande del mundu, con más de 1200 miembros gubernamentales y non gubernamentales, amás d’unos 11.000 espertos voluntarios en cerca de 160 países. Para’l so llabor, la UICN cuenta col sofitu d’un personal compuestu por más de 1000 emplegaos, partíos en 45 oficines, y cientos d’asociaos de los sectores público, non gubernamental y priváu de tol mundu.

La misión de UICN ye influyir, afalar y ayudar a les sociedaes de tol mundu a caltener la integridá y diversidá de la naturaleza y asegurar que tou usu de los recursos naturales seya equitativu y ecolóxicamente sostenible.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *