Publicado en Llingua, Sin categoría

Rede de Normalización Llingüística

«La Rede de Normalización Llingüística ta llamada a desempeñar un papel fundamental na regulación territorial de la política llingüística, na creación de servicios normalizadores nuevos, nel caltenimientu de los que yá tán funcionando y na coordinación y desenvolvimientu de l’actividá de toos ellos, porque va facer posible una xestión más eficaz y eficiente nos dos niveles de trabayu que se proponen: per una parte, nel de la representación institucional, al traviés de la participación de los cargos electos; y, per otra, nel nivel qu’axunta al personal técnico», espresa’l preámbolu del documentu desendolcáu pola Conseyería de Cultura, Política Llingüística y Turismu.

Darréu preséntase la Rede «como un instrumentu amañosu pa facer la cooperación económica, técnica y alministrativa nel desenvolvimientu d’una política llingüística afayadiza que fomente con eficacia y cercanía la protección, l’usu y la promoción de les llingües propies».

Pueden presentase aportaciones y alegaciones a la iniciativa hasta’l 2 d’agostu.

Nel artículu 3 del testu, ‘Naturaleza y finalidá’, defínese como «un órganu colexáu, d’adhesión voluntaria, de participación institucional y d’impulsu». El Conseyu de la Rede, qu’inclúi al presidente –»la persona titular de la conseyería con competencies en materia de política llingüística»–, el vicepresidente –»la persona titular de la conseyería con competencies en materia de política llingüística»–, les vocalíes –con representación de «les persones titulares de la presidencia, alcaldía, dirección, xerencia o cargu de naturaleza asemeyada de les Alministraciones públiques o entidaes que s’adhieran», como pueden ser «cámares de comerciu, fundaciones, asociaciones empreariales, de consumidores, conseyos reguladores, etc.»– y la secretaría, va exercer les competencies qu’asigna’l decretu, mentes que la Comisión Téunica va «ser el preseú de dinamización y desenvolvimientu de les funciones de los SNL», como «la realización d’estudios, proyeutos, actividaes, programes, planes y propuestes en materia de normalización llingüística».

Entes les competencies de la Rede afítase l’asesoramientu a les Alministraciones públiques o entidaes, la planificación y xestión de cursos de llingua asturiana y gallego-asturiano, la promoción de la coordinación de les actuaciones de les SNL y l’entamu de conferencies, eventos o actividaes dinamizadores pa la promoción y usu de los idiomes propios, ente otres munches. El documentu y otros venceyaos tán disponibles na web Asturies Participa pa la so consulta.

Reforzar el llabor

Nestos momentos, y dende va munchos años, ta en funcionamientu una Rede de Normalización Llingüística nos Conceyos, «de manera non reglamentada, como plataforma collaborativa de trabayu y comunicación interna ente’l personal téunicu de los servicios». Con esta iniciativa la conseyería pretende reforzar el llabor que vienen desendolcando y potenciar asina la normalización llingüística.

 

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *