Publicado en Sin categoría, TIEMPU

Estáu del tiempu: martes 8 d´avientu

Alborecemos con xarabatos intermitenta frecuentes ya intensos que vienen acompangáos de truena ya xarazu pela costa con unes temperatures que tan alrodiu de los 6ºC y nevando copiosamente perriba de los 700m, rexistrándose nel puirtu Payares -2,7ºC onde se fae obligariu l’usu de cadenes o neumáticos d’iviernu y ta prohibida la circulación al tráficu pesáu.
Güei volveremos a tener un día ivernal, con xarabatos frecuentes, con truena ya xarazu nel llitoral y nevaes copioses pela cordelera con una cota de nieve que tará ente los 700-800m pero con dellos desplomes pola intensidá de la precipitación, nos valles del interior perriba de los 500-600m n’estes primeres hores. L’aire calambrión soplará con fuercia en zones altes ya en puntos del llitorla pero amenorgando a lu llargu del día.

Mañana miércoles tendremos una pequeña tregua pela mañana con apertura de claros nel cielu y dalguna xelada nes zones favoretibles con unes temperatures mínimes en descensu ya unes másimes n’ascensu. Pela tarde aumentará la nubosidá y entamará a soplar l’aire gallegu con muncha fuercia en zones altes ya en puntos del llitoral, pudiendo algamase los 100km/h al finar el día, cuando volverá a llover de nuevu.
El xueves paez que nun lloverá tantu como se preveía y les temperatures tampoco medrarán muncho, polo que’l come nieves nun sedrá tan aniquilador, eso sí fadrá una bona llimpieza perdebaxo de los 1600m. Esti día les precipitaciones sedrán febles en xeneral y la cota de nieve oscilará ente los 1500-2000m, amás l’aire gallegu tenderá amenorgar a lu llargu del día.
Durante’l riscar del vienres mos gruzará otru frente aniquilador y esti si que fadrá llimpieza a toles cotes, anque al so pasu volverán a baxar dalgo les temperatures, asina como la cota de nieve que rondará los 1700m pero ya sin malpenes precipitaciones.
La fin de selmana sedrá más seliquina, con nubosidá variable, dalgona pecipitación feble ya dispersa y temperatures dalgo más baxes el sábadu, subiendo’l domingu.

Autor:

Maestra de Llingua Asturiana Colexu Carmen Ruiz-Tilve - Uviéu