Publicado en Revistes

Asoleyase un nuevu númberu de la revista

“Otra güeyada a Pedro Menéndez y la Memoria Pública”.


El discutiniu sobre la memoria pública recuerre’l mundu de la mano d’estatues que cada vez tienen más difícil tenese de pies. Miles de manifestantes dirixen la so rabia escontra unos pedestales nos que ven representaes les inxusticies del pasáu y del presente.
Dende ún d’esos pedestales, nel Parque’l Muelle d’Avilés, Pedro Menéndez, Adelantáu de La Florida y Gobernador de Cuba, paez barruntar lo que se-y vien enriba. Depués d’un añu d’homenaxes n’alcordanza los 500 años del so nacimientu, caldía apaecen más pruebes documentales qu’escurecen y cuestionen fondamente la so figura y los sos actos. La participación de Pedro Menéndez nel sistema esclavista utilizáu como base de la colonización d’América ye una d’elles.
La colocación d’estatues y los actos d’homenaxe alredor d’estos monumentos nun son imparciales nin neutrales, sinon que tresmiten mensaxes y, polo tanto, xeneren memoria coleutiva. Nesti casu, trátase d’esparder un mensaxe de“alcuentru de cultures”, del so supuestu valir pa siguir xuniendo les dos orielles del Atlánticu, y d’una memoria coleutiva a la que nunca-y interesó más qu’un relatu contáu a medies.
Pero les sociedaes evolucionen, cambien la so perceición de la hestoria y demanden de la investigación hestórica otros puntos de vista que nos apurran una visión completa del nuestru pasáu.
En La Trókola sabemos que la investigación hestórica nun tien de xulgar les conductes d’hai cientos d’años, pero tampoco puede paralizase nel tiempu, y tien d’asoleyar y esparder nueves informaciones y nuevos criterios pa la sociedá d’hoi.
Les estatues son llugares públicos de memoria, y como talos, tienen de tar suxetes al debate públicu. Y pa esi debate, tenemos de conocer la verdá, ensin ocultala nin manipulala.
Nestes condiciones, en La Trókola tenemos la seguridá de que les avilesines y avilesinos vamos saber vivir con esa verdá y atopar la forma na que los nuestros llugares públicos de memoria seyan verdaderamente coleutivos y non propiedá d’una única visión de la hestoria.

 

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *