Dempués de dos años naguando por ello, vuelven les Nueches en Danza. El prósimu sábadu 12 de marzu va tener llugar en L’Infiestu la primera d’elles dende qu’entamó l’andanciu.
Pa desendolcar esta actividá tamos trabayando a comuña una montonera d’asociaciones de tol conceyu: La Benéfica de Piloña, Banda de Gaites LaKadarma, Les Ablanes Asociación Cultural, Asociacion Riu Fontoria, y amc Bocanegra; too ello, col sofitu del Ayuntamientu de Piloña y la collaboración del coleutivu Nueche en danza
Amás de la Nueche en Danza tendremos otres actividaes:
A les 18.00 tarán con nós los Sidros de Valdesoto faciendo un pasucáis peles cais de L’Infiestu.
A les 20.00 tendremos al nuesu profe de baille Santi Galguera dando un taller de baldre na plaza María Xosefa Canellada.
22.30 Entamará la Nueche en Danza na mesma plaza.
Y non solo eso… Esta va ser una Nueche en Danza d’Antroxu, polo qu’animamos a tola xente a que se mazcarite pa venir!
Pa los que vengan d’Uviéu y nun quieran garrar el coche, va ponese un bus con salida a les 21.00 de Santuyanu (centru comercial) y cola vuelta dende L’Infiestu a les 03.00. P’acutar la plaza ye necesario llamar al 696.180.292.
Nun vos esmolecer si llueve porque vamos tener una carpa instalada na plaza María Xosefa Canellada (al llau de la Sala Polivalente). Tamién habrá serviciu de barra con comida y bebida
Nun vos lo perder!! Viva’l baille!!