Cabalgata del Heraldu, conciertos y xuegos infantiles: les actividaes que se van celebrar pol Martes de Campu n’Uviéu.
La Sociedá Protectora de la Balesquida entamó un ampliu programa festivu con actividaes para tolos públicos mientres esta fin de selmana.
- Fonte: La Voz /
Los uvieinos yá cunten los díes para celebrar la fiesta de La Balesquida, una de les festividaes más tradicionales y antigües d’Uviéu. Conocida tamién como’l Martes de Campu convirtióse en cita imprescindible nel calendariu de los carbayones, quien, como marca la tradición, el martes 30 van axuntase con familiares y amigos nes zones verdes de la ciudá, mientres esfruten d’una bona xinta. Al envís de esfrutar lo máximo posible mientres esta fin de selmana la Sociedá Protectora de la Balesquida —asociación gracies a la cual la centenaria celebración llegó hasta los nuesos díes— entamó un ampliu programa festivu con actividaes para tolos públicos.
De mano, güei, vienres 26, nel Teatru Filarmónica d’Uviéu la Sociedá Protectora de La Balesquida va nomar sociu d’honor 2023 al periodista y escritor, Juan de Lillo Cuadráu. Como novedá, anguaño la Cabalgata del Heraldu treslladase al sábadu. Conocíu tamién como La Fama, el popular caballeru vistíu de blancu va percorrer mañana al llombu d’un caballu’l cascu antiguu de la ciudá acompañáu d’una *comitiva al envís de llegar hasta la plaza del Conceyu para solicitar permisu a la corporación municipal para celebrar la fiesta.
Para ello va salir a les 12.30 hores de la plaza de la Catedral, para siguir pela cai Águila y Schulz. En llegando a la plaza Porlier va siguir pola cai Mendizábal, Argüelles, Progresu, Milicies Nacionales, Uría, Fruela, Pozos, hasta aportar a la plaza de la Constitución. Ellí va ser recibíu poles autoridaes locales escontra les 13.00 hores para siguir por Cimadevilla, Rúa y la plaza d’Alfonso II’l Castu, onde va siguir la fiesta con una danza prima na que van poder participar tolos asistentes.
Para calecer bien los motores, el día anterior al Martes de Campu, la Banda de Música Ciudá d’Uviéu, dirixida pol maestru David Coláu Corones, va dar a les 20.00 hores un conciertu nel patiu del Edificiu Históricu de la Universidá d’Uviéu. Una actuación estremada en seis programes para la cual nun fai falta mercar nenguna entrada, cuidao que l’accesu ye llibre hasta completar l’aforu.
