La Conseyería de Mediu Rural y Cohesión Territorial ellabora los mapes de la toponimia oficial d’Asturies. Los mapes recueyen con gran nivel de detalle los asentamientos de población (parroquies, capital del conceyu, aldees, barrios, quintanes tradicionales y cases esperdigaes). Depués van tar disponibles nel xeoportal del Principáu d’Asturies, SITPA-IDEAS (ideas.asturias.es), dende onde van poder descargase llibremente.
Los trabayos de xeorreferenciación terminaron en 49 conceyos, de los que 10 yá tienen mapa.El Serviciu de Cartografía del Principáu d’Asturies, perteneciente a la Conseyería de Mediu Rural y Cohesión Territorial, trabaya na ellaboración de los mapes de la toponimia oficial d’Asturies. Esti proyectu ye posible gracies al trabayu documental previu lleváu a cabu pola Conseyería de Cultura, Política Llingüística y Turismu a través de la Xunta Asesora de Toponimia, de conformidá colos criterios de l’Academia de la Llingua Asturiana, y a la collaboración de los propios conceyos.
La intención de la Dirección Xeneral d’Ordenación del Terrritoriu y Urbanismu, de la que depende Cartografía, ye estender esti trabayu a tol territoriu de la comunidá. Hasta la fecha, estos trabayos de xeorreferenciación remataron en 49 conceyos (de los que 10 tienen mapa), 12 tán yá n’ellaboración y 5 van empecipiar en 2021. Quedaríen por facer 12 conceyos que nun tienen aprobáu’l so decretu de normalización.
Los profesionales autonómicos en materia de cartografía realizaron, en collaboración colos consistorios, munches vegaes a través de los sos Servicios de Normalización Llingüística, un trabayu de xeorreferenciación de los topónimos oficiales incluyíos nos Decretos d’Oficialización pa treslladalos a la cartografía que se xenere sobre cadún de los conceyos.
Un comentario sobre “Nuevos mapes de la toponimia oficial d’Asturies”
Los comentarios están cerrados.