Nel Día Mundial de la Salú, que se va celebrar el 7 d’abril de 2021, convidámoslu a xunise a una nueva campaña para construyir un mundu más xustu y saludable. En curtiu vamos publicar equí más detalles, pero de siguío esplicámoslu por qué lo faemos: El nuesu mundu ye desigual.
«Construyir un mundu más xustu y saludable».
Nel añu 1948, l’Asamblea Mundial de la Salú proclamó’l 7 d’abril como Día Mundial de la Salú. Esta fecha foi escoyida en conmemoración a la fundación de la Organización Mundial de la Salú (OMS) y cola necesidá de crear conciencia sobro les enfermedaes mortales mundiales y crear vezos sanos nes persones.
La celebración d’esti día llévase a cabu dende’l 7 d’abril de 1950 y añalmente escuéyese una tema que tea basáu nes necesidaes y suxerencies que realicen los Estaos miembros.
Como punxo de manifiestu la COVID-19, delles persones pueden llevar una vida más sana y tener meyor accesu a los servicios de salú qu’otres, debíu dafechu a les condiciones nes que nacen, crecen, viven, trabayen y avieyen.
En tol mundu, dellos grupos lluchen por llegar con cuenta de mes con pocos ingresos diarios, tienen peores condiciones de vivienda y educación y menos oportunidaes d’empléu, esperimenten una mayor desigualdá de xéneru y tienen pocu o nengún accesu a redolaes segures, agua y aire llimpiu, seguridá alimentaria y servicios de salú. Tou ello provoca sufrimientos innecesarios, enfermedaes evitables y muertes prematures. Y perxudica a les nueses sociedaes y economíes.
Esto non solo ye inxustu: ye evitable. Por eso pidimos a los líderes que garanticen que toles persones tengan unes condiciones de vida y de trabayu que favorezan la bona salú. Coles mesmes, encamentamos a los líderes a monitorear les desigualdaes en materia de salú y a garantizar que toles persones puedan aportar a servicios de salú calidable cuando y onde los precisen.
La COVID-19 cutió duramente a tolos países, pero’l so impactu foi más acusáu nes comunidaes que yá yeren vulnerables, que tán más espuestes a la enfermedá, que tienen menos probabilidaes d’aportar a servicios de salú calidable y que tienen más probabilidaes de sufrir consecuencies adverses como resultáu de les midíes aplicaes para contener la pandemia.
L´OMS comprometióse a garantizar que toles persones, en cualquier llugar, puedan exercer el so derechu a la bona salú.
