Publicado en Estaciones

N’occidente interior: arizos, erizos ya hasta ouricios

N’occidente interior, tenemos arizos, erizos ya hasta ouricios qu’envuelven castañas ya razcayeiros, rezcayeiros, rezcayyeiros, rozquieiros, rescacheiros, roscacheiros, razcañeiros… con una riestra infinita de combinaciones fonéticas. Estos últimos, los animalinos, asuméanse por fuera a los primeiros ya habitan los mesmos sitios más ou menos.
Los arizos son la cubierta de pinchos que cubre la semiente de la castañal ou castañar, ía dicir, las castañas. Por esti tiempu, entrando yá no mes de las castañas propiamente (los santos, noviembre ou samartín), empicipian a caer del árbol ya nós salimos al rebuscu ou al rebusque, a pañar castañas en definitiva. Antiguamente, espuéis de vareixar las castañales ou castañares, que yera una xeira peligrosa enforma na que siempre morría xente, porque agatañar ya engaramase no picu l’árbol pa xiringar bien las canas ya que cayeran conos arizos las castañas tan apreciadas nun yera pouca cousa; guardábanse arizos ya castañas nas xoxas ou corripas, que son esas paredes circulares de piedra qu’inda pueden vese a montones nos nuesos castañeos, castaneos ou castañaleos, desgraciadamente, privadas yá de la súa finalidá. Nesas xoxas ou corripas guardábanse bien húmedos ya cubiertos de fuea, canas ya outros restos vexetales arizos ya castañas, lo que fadía qu’amugaran creando un ambiente ensin aire ya con unas condiciones d’humedá que permitía conservar las castañas más tiempu, amás d’evitar qu’abicharan.
Pa desarizar, deserizar ou desourizar ya nun pinchase sacando las castañas de los arizos, úsanse las bornazas, pañaderas ou tiñazas, que se fadían principalmente de castañal brava ou de capudre, capudru ou capurriu.
Outramiente, l’animal que se pare a los arizos, el rezcayeiru, ía omnívoru ya aliméntase, ente outras muitas cousas, de las castañas de los arizos.
Las imáxenes de las bornazas, pañaderas ou tiñazas ya las de la xoxa ou corripa tán sacadas de Fuchasqueiru, una publicación de 1989 del Cuelmu Ecoloxista Pésicu.

 

4 comentarios

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *