Publicado en Día de...

51 Festival de la Avellana de L´Infiestu

Llega el 51 Festival de la Avellana de L´Infiestu que se celebrará este fin de semana. Os compartimos el programa completo de actividades que incluye también el programa de Ferias y Fiestas de Santa Teresa. Programa.

Cartel de Quique Carballeira

Festival de la Avellana Infiesto

L’ablana guarda de forma hermética’l so frutu. Unu pulgu duru que namá llarpia por presión de los dientes o de dalgún artiluxu. El sabor interior de l’ablana ye parte del sabor rural d’Asturies y del so paisaxe, nel qu’apoderen arbitrariamente les ablanares, que les sos vares fueron útiles xeneración tres xeneración para munchos llabores del campu, y non yá para socatrar al ganáu. Esti 2022 ye’l 2 d’ochobre.

El primer domingu d’ochobre, la localidá d’Infiestu rinde homenaxe a eses ablanes que va unos sieglos partieren para’l continente atropaes en barcos n’esclusiva (en plenu sieglu XVIII yera normal ver llegar buques ingleses al puertu de Xixón para cargar ablana, y lo mesmo asocedía nel puertu de Villaviciosa y Ribesella). La producción asturiana sufrió un llargu trespiés por otru tipu d’especializaciones ganaderes que la asocedieron, según una baxa cotización del productu. L’ablanar siempres presente quedó dende entós escondíu nel paisaxe, ensin nengún enfotu d’esplotación o comercialización. Namá delles zones como Piloña, con Festival de l’Ablana incluyíu, intenten recuperar el símbolu de l’ablana, y tamién el potencial comerciu d’esti frutu secu, cada vez más demandáu en brutu y como deriváu para la repostería o empreses llicoreres. Asturies, con decadencia ablanera y tou, ocupa’l segundu llugar nacional de producción tres Cataluña. Cuenta con variedaes autóctones tales como: Negreta, Amandi, Quirós, Espinareda, Casina y Villaviciosa, qu’ocupen un llugar preferente na escala internacional de calidaes.

Na Piloña actual, l’ablana atopó de nuevu xusta reconocencia en calidá y camina escontra la cantidá anovando los sos árboles y creciendo en nuevos plantíos. L’ablana tien futuru y vese sofitada nestes tierres por cuntar con marca propia. Tamién ayuda enforma la organización d’un festival que superó’l so triségimo aniversariu, que yá s’hai avera en vientes a les 20 tonelaes n’apenes dos díes de mercáu, y que se convierte en llugar emblemáticu de l’ablana asturiana percima d’otros conceyos que tamién cuntaron con gran tradición ablanera como Ayer, Cornellana, Teberga, Belmonte, Grau, Quirós o Ayande.

Si tiramos de manual técnicu, l’horizonte ablaneru de Piloña pasa por volver a sentar les bases d’una nueva nacencia. Ye necesariu remocicar les plantes, abonar y realizar controles fitosanitarios. EI remocicamientu efectúase por aciu fradadures, suprimiendo’l 50% de la vexetación para provocar la emisión de cañes nueves, esaniciando les cañes seques y les que tean descomanadamente inclinaes. Tamién s’aportuna na idea de que munches ablanares presenten condiciones demasiáu avieyaes y qu’hai qu’optar por replantar.

Y replantando ablanares abónase tamién una ilusión colectiva y toa una gastronomía paralela na que toa Asturies va siguir teniendo espeyu. Por eso’l Festival de l’Ablana convoca tanta mira y tanta xente. Los galardones otorgaos nesti certame tamién ayuden: los premios a la calidá del frutu, meyores pañadores, los más nuevos, los de mayor edá, premiu a los plantíos y a la repostería con ablana…
Información d’interés:

Bizcochu d’Ablana

Para faer el bizcuechu, entemezse la nata col azucre y remuévese selemente hasta ponelo cremosu. De siguío amiéstense trés yemes, arrayadura de llimón y coñá. Entemezse tou bien.

Cuando esto yá tea, #añedir farina col lleldu y los trés clares batíes a puntu de nieve. Entemezse bien tou y métese al fornu (150 graos).

Para faer la crema, faise una crema pastelera. Ponse a ferver la lleche al pie de la canela y el llimón, dixebrando un pocu de lleche para entemecer cola maizena. Cuando la lleche empiece a ferver, añedimos l’azucre y la lleche cola maicena, revolviendo costantemente. Cuando tea nel so puntu, retirase del fueu y entemezse coles ablanes molíes. Déxase esfrecer.

Cuando tengamos tou esto, partimos en dos partes el bizcuechu y bañamos col almíbar la primera; dempués echámoslu siquier la metá de la crema bien estendida pol bizcuechu; ponémos-y la otra capa y volvemos bañalo col almíbar untando más crema percima. Una vegada fechu esto, espolvoriscase con azucre y lo *requemamos con una plancha. Si sobra crema, va utilizase d’adornu.

Ingredientes del bizcuechu

3 güevos, arrayadura de llimón, 1 taza d’azucre, 1 taza de nata, 2 taces de farina, 2 cuyaraes d’azucre, 2 cuyaraes de coñá y lleldu.

Ingredientes de la crema

1 llitru de lleche, 4 cuyaraes de *maizena, 250 *grs. d’ablanes molíes, canela, 11 cuyaraes d’azucre, llimón y almíbar (agua, azucre y coñá).
Testu: © Ramón Molleda

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *