Programa de reportaxes pa treslladar la realidá social del Principáu dende la mirada coral de los reporteros d’Asturies. repor.
Cada capítulu d’Asturies repor va tocar una tema del nuesu día ente día, so la mirada de cuatro reporteros, col sellu Conexión Asturies. Cuatro miraes cercanes que van buscar afondar nes hestories de los protagonistes, analizándoles dende la óptica d’un espectador interesáu deseosu d’afayar eso que lu arrodia y que munches veces desconoz, a pesar de tenelo al algame de la mano.
Histories de superación, personaxes singulares, vides insospechaes, situaciones estremes son dalgunes de les llinies de conteníu que vamos a atopar n’Asturies repor.
Cada programa va unificar sol so títulu cuatro reportaxes entellazaos que busquen el contraste y l’interés de l’audiencia por temes bien desemeyaos ente sí pero con un denominador común que los unifica.
Reporterismo de cai y a cuerpu de cai con un formatu onde l’acción y la palabra de los protagonistes van al empar p’abordar histories anónimes d’asturianos y asturianes.
