Publicado en Música, Sin categoría

«Prefiero ver llover» (Silvia Quesada)

Prefiero ver llover Pasámonos la vida arreglando’l futuru y esi futuru nun va dicinos más qu’una sentencia sabida: la vida nun tien arreglu. Conocemos el final del cuentu y dedicámonos a aforrar, a guardar, a naguar polos tiempos meyores ensin saber que son los que tamos viviendo. Por eso yo nun quiero que naide me cuente’l final, prefiero ver llover y dexáme llevar. Y eso ye lo que faigo nestes canciones, lo que fixi siempre. Cantar ensin pensar si suena bien, cantar pa celebrar que sigo cantando y que dalguién me siente, en tolos significaos del verbu “sentir”. Gracies por escuchar música aunque digan que mañana va haber tormenta. Gracies por sentavos al mio llau pa ver como l’orbayu fai de pincel limpiando lo malo.
Silvia Quesada ye una cantante ya instrumentista asturiana con una trayectoria granible a pesar de la so mocedá. La so voz nun ye nueva pa los oyíos de nengún de los aficionaos a la música asturiana y n’asturianu de los últimos años.
– Foi integrante de la Banda de Gaites Cántara, de La Espina, na que collaboró demientres once años como gaitera, participando nos sos cuatro trabayos discográficos (“Puerta d’occidente”, “La leyenda de Nonaya”, “Mar de nubes” y “Letía”).
– Formó parte del colectivu Muyeres (2004 – 2011), participando con voz y pandereta nos discos “Onde canta la culiebra” y “Keltikhé”. “Entamu”, y de Los Gatos del Fornu, colos qu’espublizó la grabación “Na Cai” (2008)
– Collaboró, cantando y a la percusión, nel discu “Cantoras y a bordones” (2008) de Celia González.
– Foi la voz principal del grupu Tejedor dende’l 2011 hasta la so reciente desapaición, grabando con ellos tres de les canciones de “Positivu” Cola esperiencia qu’acabamos de presentar y tres d’un tiempu de reflexón, decide aceptar la propuesta del productor discográficu Pablo Quiroga pa grabar el so primer discu col so propiu nome, que s’espublizó en 2014 pol sellu Algamar Producciones.
Tamos falando de “La pena abierta”, un conxuntu de diez canciones, escrites ocho por Alfredo González -con collaboración nes lletres de Berta Piñán, Pablo Texón, Laura Fernández y Boni Pérez- y dos por Javi Vallina, alma mater del grupu Bueno.
Con esti discu foi finalista del Premiu Al Meyor Cantar (cola canción que-y da títulu) y, nel 2015, llevó’l Premiu AMAS a la Meyor Voz. Nel primer conciertu que l’artista tinetense facía cobrando entrada, colgó’l cartelu “sold out” nel hotel Palaciu de Merás de Tinéu, con 200 llocalidaes vendíes y collaboraciones de luxu como Marisa Valle Roso, Nacho Vegas y Javi Vallina (de la banda Bueno). Pesllada la puerta qu’abrió con esti discu, el 7 de marzu volvió a les plataformes dixitales con un nuevu single escritu por Alfredo González y tituláu “La mesma revolución”, una canción feminista de corte pop, pensada pa remover conciencies al tiempu que les tiestes y los pies. Un cantar que fizo d’adelantu del nuevu trabayu en solitario, “Prefiero ver llover”.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *