“Tou alredor del horru ye cultura viva”
Ayalga, el proyectu que recupera xoyes del patrimoniu asturianu. L’Asociación del Horru lleva a cabu una iniciativa que pon en contactu a donantes y adoptantes d’esta figura etnográfica.
Ayalga, que n’asturianu significa tesoro o alhaxa, ye’l nome qu’escoyeron dende l’Asociación del Horru Asturianu para’l proyectu col que fomenten la recuperación d’estos emblemes del patrimoniu del Principáu. La iniciativa, esplica’l presidente de l’asociación, Víctor Suárez, surde, per un sitiu, “viendo la cantidá d’horros qu’había perhí abandonaos” y por otru “la cantidá de persones que se taben poniendo en contactu con nós y que taben interesaos n’adquirir unu”.
Arriendes de esa necesidá, arrincó’l proyectu Ayalga, que pon en contactu a persones que quieren vender o donar los sos horros o paneres con posibles adoptantes o compradores y que, en menos de dos años, superó en demasía les mires de les sos impulsores.
Amás d’esto, los usos que pueden dase a los horros y paneres atópense bien llindaos. El pasáu mes de marzu’l Principáu d’Asturies presentó’l primer ‘Plan del Horru’, qu’anguaño s’atopa en periodu d’allegamientos y col que pretende ampliase les posibles funciones alternatives d’estos elementos, ente que nun tean declaraos como Bien d’Interés Cultural (BIC) o suxetos a una especial protección, pero siempres venceyaos a una vivienda y como anexu a ésta.
“Muncha xente mal informada piensa que puede faer vivienda d’un horru”, espón Víctor Suárez, “eso nin se dexa nin se va a dexar”. “Para una salita, una biblioteca o una habitación d’invitaos sí, anque ye un peligru porque depués tienes invitaos tolos díes”, bromia.
