Pretendía ameyorar los códigos de barres con un sistema más rápidu y qu’almacenara más información.
- Fonte noticia: El Correo.com /
- QR: semeyes / xenerador /
L’inxenieru xaponés Masahiro Hara creó fai 27 años los códigos QR, pero foi agora, cola pandemia, cuando’l so usu disparóse. «Toi bien contentu», diz. Anque él nun ganó nin un euru col so inventu…
Decía Picasso que la inspiración esiste, pero tien d’atopate trabayando. Al xaponés Masahiro Hara –inxenieru xefe de Trupu Wave, una empresa d’automoción que sirvía pieces a Toyota– la inspiración pilló-y nun descansu del trabayu.
Corría l’añu 1994. Hara acababa de xintar y echaba una partida al Go, una versión del axedrez bien popular n’Asia, antes de reincorporase al so puestu. Vio que les fiches blanques y negres dispuestes sobre’l tableru formaben unos patrones interesantes. Quedóse atochecíu un ratu, pero nun foi pa calcular la so siguiente xugada. Recuerda que se sentía como si tuviera viendo un paisaxe familiar, pero que nun terminaba d’identificar.
«De sópitu, reparando la disposición de les pieces sobro esi fondu binariu, en dos colories, di cuenta de que yera una manera bien fácil de tresmitir información. Foi como una revelación».
Pasaron 27 años dende aquel momentu ‘eureka’ y güei los códigos QR (por quick response; n’inglés, respuesta rápida), como fueron bautizaos, tán perdayures. Esos códigos son capaces d’almacenar una cantidá inxente d’información. Pero lo más importante nun ye la cantidá de datos que contienen, sinón qu’actúen como una llave que dexa al usuariu aportar a ellos de manera rápida, d’ende’l nome.
Naquel momentu, sicasí, Hara nun podía acolumbrar l’ésitu que col tiempu llegaría a collechar la so aplicación. Tenía coses más modestes y engarroses de les qu’esmolecese. «La nuesa compañía utilizaba códigos de barres pa controlar les pieces qu’unviábamos a Toyota. Pero yera un sistema ineficiente. Había ente ocho y diez códigos de barres en cada caxa. Los emplegaos taben fartos d’escaniar cada paquete de caxes delles vegaes. Sicasí, un solu códigu QR ye capaz de contener un gran volume d’información y de tresmitilo con un solu escanio», remembra.
«Non, nun recibimos una comisión cada vez que s’utiliza. Yá que fuera asina». En China, por casu, úsase 1800 millones de vegaes al día solo para pagos ensin efectivu. Hara consuélase pensando que quiciabes si nun lu regalara al mundu la so invención, güei nun sería tan universal.
A partir del añu 2000, cuando recibió la certificación ISO, esta tecnoloxía empezó a introducise na vida cotidiana de Xapón, primero nos apuestes de les carreres de caballos para identificar rápido los boletos ganadores.
El pasaporte covid dio-y el puxu definitivu. Pero la pandemia camudó definitivamente la nuesa opinión sobro estes etiquetes albinegras y con aspeutu de llaberintu que sirven de salvoconducto ente’l mundu físicu y el dixital. Los restoranes empezaron a estamparlos nes meses pa sustituyir a les amansuñaes cartes. Y la implementación del pasaporte COVID dio-y el sofitu definitivu. Güei sirven pa casi tou y, lo más importante, acostumémonos a ellos. Nesti nuevu mundu macerado en xel hidroalcohólico, los códigos QR evítennos abrugar les superficies de los oxetos, el dineru, les entraes a un conciertu o a un estadiu, les puertes y tornos automáticos nel tresporte públicu, los embalaxes de les unviaes de paquetería…
