Semeya del nuesu collacius Xuan Nel Gonzali de los picos el Murriondo, a la manzorga, ya La Llinar, a la drecha, na Cordal de Bufarán.
Güei vamos tener nubosidá alta, una vegada que se dixebren los borrinos y nublines del alborecer. Pela tarde pue tener ciertu desendolque y dexar cayer dalguna gotera ocasional y dispersa, sobre too na cordelera y fastera más surocidental. Per otru lláu les brises costeres van metenos la nublina de la mar pel llitoral, al tar entovía l’agua dalgo fría y calecese la tierra en forma estos díes, condicionando d’esta fastera les temperatures másimes que malpenes algamarán los 18-19ºC. Nel restu rozaremos de nuevu los 24-25ºC.
Mañana sábadu la nubosidá sedrá más abondosa y durante la tarde van a estendese los xarabatos de calter tormentosu pe la mayor parte d’Asturies, amás puen ser moderaos. L’aire sedrá sele de componente norte y les temperatures descenderán llixeramente, calteniéndose tovía un ambiente chornosu.
El domingu sedrá un día mui asemeyáu, con menos nubes pela mañana y con desendolques pela tarde que mos dexarán de nuevu xarabatos tormentosos que puen tener calter moderáu, con unes temperatures que camudarán poco.
Paez que’l llunes alboreceremos con borrinos y nublines pero rápidamente van dixebrase y el día quedará con escasa nubosidá con unes temperatures en llixeru ascensu pero condicionaes pol vientu nordés que pue soplar molestu pela costa.
