Publicado en NATURA

Ornitólogos y ecoloxistes refuguen la suelta de pigargos n’Asturies

«Hai munches especies autóctones que se tán escastando
y precisen una atención urxente», dicen,
señalando al urogallo o a la náyade margaritona»

El grupu ornitolóxicu Mavea y la Coordinadora Ecoloxista d’Asturies (CEA) espresaron el so refugu a la suelta d’exemplares de pigargo européu n’Asturies, un ave rapazu de grandes dimensiones y escastada na Península Ibérica dende’l sieglu XIX, al afirmar que la so presencia nel Principáu nun ta documentá y alvertir de que ye un depredador tantu de peces como d’aves acuátiques como la mabea moñudo, que la so población ta en cayente.

Nun comunicáu, Mavea aseguró que «nun hai nenguna observación, nin actual nin histórica, de la presencia d’esta especie n’Asturies», que se trata de «una especie rara n’España» y que por tantu la so reintroducción «son castiellos nel aire ensin bases sólides», cuando amás «hai munches especies autóctones que se tán escastando y precisen una atención urxente, como por casu, l´urogallo o la náyade margaritona».

Pela so parte, la CEA recordó qu’el pigargo ye una especie non amenaciada que ta «n’aumentu a lo llargo de la so enorme área de distribución que s’estiende per Europa central y occidental y la mayor parte d’Asia», y por tantu «nun tendría de ser oxetivu de midíes específiques de caltenimientu».

A esti respectu, la organización conservacionista incidió en que «el dineru disponible ye llindáu» y «dellos cientos d’especies tán en peligru o son vulnerables a la estinción n’Asturies», como asocede col urogallo «como especie agora más amenaciada».

Nueve pigargos europeos procedentes de Noruega viven dende’l pasáu llunes nun xaulón de grandes dimensiones na localidá asturiana de Pimiango para la so aclimatación antes de ser lliberaos nes próximes selmanes.

El proyectu impulsáu polos gobiernos d’Asturies y Cantabria y el Ministeriu pa la Transición Ecolóxica xuntu cola Asociación Grefa preve soltar una ventena d’exemplares nun períodu mínimu de siete años con cuenta de se estableza nel futuru una población reproductora de la especie n’España.

Los pigargos europeos, los más grandes de la especie, cunten con un llargor que bazcuya ente 70 y 90 centímetros y una estensión de nales de 2 a 2,5 metros y trátase d’un ave sociable cola so propia especie anque d’adultos caltiénense solitarios o en pareya.

La especie ta asitiada dende Groenlandia hasta la mariña del Pacíficu d’Asia y se -y documenta dende’l nivel del mar hasta los 2.000 metros d’altitú y n’Europa vese nel Mediterráneu pero ye más frecuente al norte del continente, onde habita nes mariñes y nes proximidaes de los depósitos y cursos d’agua y aliméntase de pexes y aves acuátiques.

N’España considerase a la especie escastada dende’l sieglu XIX anque’l Llibru Coloráu de les Aves señala que se rexistró en cuatro causes la so presencia na Albufera de Valencia (1887 y 1916), Castellón (1942) y Delta del Ebro-Tarragona (1953), pero siempres se refier a exemplares solitarios que fueron cazaos, informa Efe.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *