El 2 de mayu celebra’l Día Mundial del Atún, una especie que ta sometida a una sobrepesca pol so valir nutritivu y económicu. Les Naciones Xuníes decretaron esti día nel añu 2016, siendo 2017 el primer añu de celebración.
A nivel biolóxicu, l’atún ye un pexe estraordinariu. Naden con velocidaes de cruceru de 3 a 7 km/h, pero pueden algamar los 70 km/h y, escepcionalmente, son capaces de superar los 110 km/h en percorríos curtios. Viaxen grandes distancies mientres les sos migraciones percorriendo hasta 50 Km. diarios.
Ciertes especies d’atunes pueden somorguiase hasta los 400 m de fondura, y son capaces de saltar bien alto fuera de l’agua. Son de sangre templada, y son conocíos por formar equipu con delfines para protexese de los tiburones.
¿Por qué ye importante l’atún para l’home?
Munchos países nel mundu dependen del atún para la nutrición, el desenvolvimientu económicu, l’empléu, ya inclusive la cultura y l’ociu. Anguaño, 96 países tienen un sector pesqueru dedicáu al atún, con miles de barcos qu’afaenen pelos océanos del mundu enteru.
Les especies d’atún representen el 20% del valor de la pesca marítima y más del 8% de tolos productos del mar que se comercialicen nel mundu. Dependemos del atún para nuesa mesma subsistencia. Por eso, y pol #valor de la especie en sí, ye necesariu protexer los recursos y ecosistemes d’esti pexe.
La Organización de les Naciones Xuníes para l’Alimentación y l’Agricultura (FAO) alvirtió nel so informe (de 2016) «L’estáu mundial de la pesca y l’acuicultura» sobro la necesidá d’una xestión más eficaz pa restaurar les poblaciones sobreexplotaes como la del atún.
En dichu informe, la FAO rexistró nueves prindes récord pal atún. La FAO señalaba, tamién, l’alta demanda del mercáu d’atún y l’escesu de capacidá persistente de les flotes pesqueres.
L’amenorgamientu de les reserves d’atún como resultáu de la sobrepesca fai necesariu un marcu llegal internacional, como se reflexa na Convención de les Naciones Xuníes sobro’l Derechu del Mar.
