Publicado en Arqueoloxía, La Nueva España

“Los castros son la nuesa seña d’identidá…”

José Antonio Fanjul, Arqueólogu y director técnicu d’escavaciones del castru de Cabo Blanco:

“Los castros son la nuesa seña d’identidá y
lo más importante ye que toos puedan entendelos”

“El primer mandamientu ye siempres caltener los restos yá escavaos antes de metenos n’otres zones nueves por esquizar”

L’arqueólogu José Antonio Fanjul, “Tonu”, mientres los trabayos nel castru de Peña Aguda, en Belmonte.

Los castros marítimos asitiaos na mariña, unes ayalgues arqueolóxiques asturianos nos que “vamos poder reparar una secuencia completa de lo que foi la vida nellos, dende la primer Edá del Fierro hasta la Roma imperial”, son los protagonistes del tercer volume de la colección “La cultura *castreña asturiana”, que llega esta fin de selmana a los kioscos xuntu coLA NUEVA ESPAÑA, y na que participa José Antonio Fanjul, a quien los sos amigos conocen como “Tonu”. Ye arqueólogu y exerz de director técnicu d’escavaciones nel castru de Cabo Blanco, n’El Franco.

–¿Qué suponen los castros p’Asturies?

–El patrimoniu de la rexón nun ye comparable al que puedan tener Andalucía o’l Pandu, por casu. Les nueses mayores peculiaridaes son l’arte paleolítico, la cultura castreña y, per otru llau, el Prerrománicu, polo que son la nuesa seña d’identidá.

–Dizse qu’hai menos d’un 5% de la superficie *castreña escavada y estudiada n’Asturies. ¿Per ónde empezar?

–Lo primero qu’habría que faer ye caltener lo que yá ta caváu. Intentamos de cutio tar reparando ciertes obres del pobláu que, pol pasu del tiempu, fuéronse deteriorando. El primer mandamientu ye siempres caltener antes de metete n’otres zones.

–¿Qué supon el castru de Cabo Blanco, al que ta especialmente amestáu?

–Supon unu de los pocos castros esquizaos dientro de la mariña asturiana ysobremanera, de la zona que correspuende col interfluvio del Navia y el Eo. Con esti castru tenemos una secuencia completa de lo que foi’l poblamientu nesta zona, dende la primer Edá del Fierro hasta la Roma imperial.

–Un castru que nun paez un castru porque se taparon les construcciones para calteneles. ¿Por qué unos castros tápense y otros non? ¿Nun ye un pocu *frustrante para un arqueólogu esta situación?

–Un castru, una vegada que s’abandona, adquier un equilibriu que lu caltien, y nós rompemoslo a la hora d’escavar. Poro, la meyor manera de caltenelos ye tapalos al acabar d’estudiar. Nun ye nenguna traxedia. Y en el casu de qu’hubiera que desatapalo otra vegada para cualquier fin, sería bien fácil. Siempres empresta tenelo a la lluz, pero sería peor para’l so caltenimientu.

–N’Asturies la mariña ta llarada de castros marítimos. ¿Presupon qu’esos allugamientos teníen que ver principal y directamente colos recursos marinos?

–De xacíu, utilizaríen los recursos del mar, como la pesca y el marisquéu, pero nun hai que refugar la ganadería y l’agricultura. Amás, los castros costeros son peculiares porque la mayoría d’ellos tienen los cantiles como defensa natural.

–¿Cuál cree que sería la capacidá marítima de les poblaciones del norte de la Península?

–Nesa dómina tenemos como referencia’l saléu de los romanos, puramente de cabotaxe. Esto quier dicir que nun se producía n’alta mar, sinón que se llevaba a cabu na mariña; nun sería unu saléu d’altor, diríen barganal de tierra faciendo esguilaes en ciertos puntos accesibles para atracar. Tou esto podemos reparalo, por casu, nos castros de Tapia de Casariegu.

–Falando de Tapia, hai once castros n’apenes unos kilómetros cuadraos. ¿Hai qu’entender esto como una especie d’espaciu metropolitanu castreñu”?

–Non, yo nun diría eso. La densidá, tanto de castros marítimos como d’interior, na metá occidental ye mayor que na oriental, probablemente porque les condiciones yeren meyores, o porque nun tenemos claro entá’l tipu de población qu’había entós daquella nel Oriente. Amás, amás de lo que conocemos, hai que tener en cuenta lo que desconocemos. Yo asimilolo más a les aldegues actuales, con agricultura, ganadería y pesca.

–La colección de LA NUEVA ESPAÑA avera’l mundu de los castros al públicu polo xeneral. ¿Produz ciertu vértigu pa un investigador asumir un llinguaxe periodísticu y bien divulgativu, non tan precisu como’l técnicu?

–Non, nesi sentíu entendemos que lo que nós faemos ye afayar patrimoniu, y este pertenez a toos. Lo más importante ye que tol mundu pueda entender lo que son los castros. Una cosa son los artículos que los científicos escribimos y otra cosa ye la divulgación. Aprofio que ye vital que’l gran públicu entiendelo.

–¿Qué-y paez qu’esistan iniciatives como esta colección?

–Paezme fundamental por tou lo que falemos. Los castros nun se deberíen quedar en daqué ente un grupu amenorgáu d’arqueólogos, sinón que tendríen de llegar al gran públicu, y un periódicu como LA NUEVA ESPAÑA ta faciendo qu’asoceda. Amás, ta actualizando aquelles publicaciones qu’hubo nos años noventa sobre la hestoria d’Asturies, y que siguen siendo munches vegaes referencia y sitiu de consulta, non solo pa la xente, sinón pa científicos y estudiantes d’estes temes. Ye una iniciativa de lo más lloable.

–¿Qué podemos atopar nos llibros?

–La xente que los merque va atopase un discursu bastante claru sobre lo que significaron esi tipu de poblaos, les sos maneres de vida… Amás, pueden reparase, d’una manera bien didáctica, toes los tresformamientos, los materiales qu’emplegaben, como pueden ser les cerámiques o los metales… Y munches otres coses.

El tercer llibru, “Los castros del mar”, llega a los kioscos la fin de selmana

“Los castros del mar” ye’l títulu del tercer llibru de la colección “La cultura castreña asturiana”, qu’edita LA NUEVA ESPAÑA. Tres la gran acoyida de la primera y segunda entrega, va llegar a los puntos de vienta la próxima fin de selmana, 7 y 8 d’agostu, y va tar disponible por solu 4,95 euros más el periódicu del día. “Los castros del mar” ye un impresionante homenaxe a los paisaxes cantábricos al traviés de los poblaos de la Edá del Fierro que se fueron asitiando na mariña d’Asturies, bien na mesma llínea de mariña colonizando cabos o bien nes proximidaes marítimes y nes rases mariniegues. El llibru percuerre los poblaos castreños costeros del Occidente y del centru de la rexón (los del centru oriental y oriente asturianu encetaos nel sestu volume de la colección), dende O Corno, en Castropol, hasta El Molín del Puertu, en Gozón, yá col Cabu Peñes nel horizonte. Y como tou viaxe tien un puntu de partida, “Los castros del mar empecipiaron nel castru de Cabo Blanco, n’El Franco.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *