Alborecemos col cielu poco nuboso o escampláu ya con unes temperatures que tan alrodiu de los 7ºC, rexistrándose nel puirtu Payares -0,7ºC.
Esti llunes vamos tener el cielu poco nuboso o escampláu con unes temperatures fríes n’alborada anque la llume del sol, pali que pali, va dir caleciendo l’ambiente, amás l’aire amenorgará abondo y la sensación térmica sedrá afayaiza.
El martes va dir entrando vientu ábrigu que baxará la humedá y fadrá subir abondo les temperatures col cielu empuercáu de nubes medies y altes, empeorando abondu la situación nel monte colos incendios d’estos díes, situación que va dir a peor de cara al miércoles cuando les raches de vientu van dir ganando fuercia, sobre too en zones de montaña onde puen algamar los 70 km/h, amás les temperatures siguen subiendo con másimes perriba de los 25ºC.
El xueves seguiremos baxo la mesma situación de vientu ábrigu, baxa humedá y temperatures mui perriba de lo normal, caldu de coltivu pa que los incendios se propaguen y seya difícil controlalos, per ello pedimos másimu precuru estos díes nel monte, les condiciones van ser mui dures y la seca yá ye mui importante.
El vienres va dir arreciando l’aire pero a la vez rolando a componente oeste-noroeste polo que la humedá pa dir ganando terren y les temperatures entamen a baxar , amás nel cielu tendremos nubes que puen dexar dalguna gotera o xarabatín feble ya dispersu.
Y de cara al sábadu y domingu esperase un enfriamientu importante con precipitaciones febles ya disperses y dalgo de nieve pela cordelera perriba de los 1300m pero esto yá lu diremos viendo.
