Publicado en Música, Novedaes

Fontoria: «Nueche d’Avientu

«Nueche d’Avientu»: El regalu musical de Fontoria pa estes fiestes. La banda piloñesa Fontoria regálanos estes fiestes un perguapu villancicu que s’acaba d’asoleyar esti primer día d’avientu. 

Trátase nesti casu del tema entituláu «Nueche d’Avientu», con lletra y música firmaes por Maxi Areñes. Aprovechando les grabaciones de lo que va ser el tercer trabayu discográficu de la banda, los músicos decidieron desendolcar un llabor especial p’aportar un nuevu regalín pal mundu, nestos tiempos complicaos de pandemia y esmolecimientu.
El son yá baillaba na mollera Maxi dende la grabación del primer discu del grupu, «Nordés» (2019) y foi cuando editaron el so segundu trabayu «El máxicu viaxe de Fionna de Morlay» (2020), cuando el músicu y escritor decidió crear una lletra col motivu de grabar un villancicu que saliera editáu pa estes feches.

La lletra narra cómo unos músicos vuélquense con una familia probe, al enterase del nacimientu na casa d’un neñín y deciden sofitalos con too lo que pueden. Diz Maxi qu’aunque nel canciu los pas del neñu nómense Xosé y María, «bien podíen llamase Xuan, Ana, Abdul, Fátima y de cualquier otra forma, teniendo en mente tantos y tantos casos de necesidá y el drama de los exiliaos». Pa la grabación tuvieron qu’organizase perbién yá que, por exemplu, Nagore Goikolea, vigulinista y harpista de la formación, reside n’Euskadi y lóxicamente tuvo que grabar ellí la so parte pa que Maxi incorporara la so pista dende’l so estudiu n’Areñes (Piloña).

Pablo Pumarada, percusionista del grupu, incorporó el bodhran, y Xosé Ramón «Navia» ocupóse, como siempres, del curdión y la gaita. Maxi Areñes encargóse de la voz, guitarres, mandola, mandulina y cascabeles, amás d’encargase de la producción del tema como yá fixera nel caberu discu de la banda y como fadrá nel nuevu trabayu que ya tán entamando. Llevará’l títulu de «Sirio» y ta previstu pa final del branu de 2021.

Autor:

Maestra de Llingua Asturiana Colexu Carmen Ruiz-Tilve - Uviéu