Publicado en Curiosidaes, NATURA

El tabayón (catarata) más grande del mundu atópase sol océanu

Esisten munchos tabayones en tol mundu, pero la más grande de toes ta fora del algame de la vista del ser humanu, porque, a diferencia de les más conocíes como les del Niágara o del Iguazú, atópase so l’agua.

Esti xigantescu tabayón ta xusto debaxo del estrechu de Dinamarca que, magar el so nome, en realidá ta ente Islandia y Groenlandia, y conecta el mar de Groenlandia col d’Irminger. El tabayón empieza a aprosimao 600 metros de fondura (2,000 pies) y estiéndese por un total de 3.5 kilómetros (11,500 pies), ente que’l so anchu algama los 160 kilómetros (100 milles).

La entruga que vien darréu dempués de conocer estos datos ye casi obvia: ¿cómo ye posible qu’esista xuna tabayón submarín? En realidá toa débese a les lleis de la física, yá que nel llugar onde s’atopa esti tabayón conflúin dos corrientes d’agua a distinta temperatura. Les agües del mar de Groenlandia provienen del océanu Árticu y son bien xelaes, ente que les del mar d’Irminger, que’l so orixe ye l’Atlánticu, son más templaes.

Estes distintes temperatures faen que los dos corrientes tengan diverses densidaes; nesti casu, l’agua más xelada ye más densa. Por tanto, y tal como esplica la infografía de más enriba del National Ocean Service d’Estaos Xuníos, l’agua más xelada forma xuna corriente que baxa por esta especie de paré submarina, creando asina lo que se conoz como la cascada más grande del mundu pola que baxen cinco millones de metros cúbicos d’agua per segundu.

A manera de comparanza, los tabayones del Niágara lleguen a los 168,000 metros cúbicos d’agua per minutu. La diferencia, ta claro, ye qu’aquel tabayón puede vese a güeyu, non como’l monstruosu tabayón de los mares del norte que solo nos podemos imaxinar.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *