Publicado en TIEMPU

Estáu del tiempu: sábadu 27 de payares

Bonos díes, bona xente.
Presentase’l día pa dar media vuelta y volver pa la cama. Nel cielu tenemos nubosidá abondosa con xarabatos, granizu, muncho vientu y nieve pela cordelera. Les temperatures tan mui condicionaes pol vientu qu’mpide que baxe l’aire fríu y s’asiente, amás como ye de procedencia marina y l’agua del mar ta a 17ºC fae que se recaliente y suban les temperatures nel llitoral y fastera central, mentanto na cordelera nun-yos afeuta y tienen precipitaciones fuertes y persistentes en forma de nieve. Con ello tenemos unos 10ºC na costa y sobre los 5ºC nos valles interiores, rexistrándose nel puirtu Payares -3,2ºC onde nieva intensamente y se fae obligatoriu l’usu de neumáticos d’iviernu o cadenes, tando peslláu pa camiones.
Güei vamos tener xarabatos intensos pero curtios na costa y fastera central asturiana por mor del veintu que va soplar con fuercia del norte-noroeste, amás vendrán acompangaos de truena y xarazu, con unes temperatures en descensu y una cota de nieve que rondará los 800m. Mentanto nos valles del interior y cordelera los xarabatos van ser persitentes y mui abondosos con nevaes copioses perriba de los 600m con desplosmes durante la tarde-nueche a los 400m. Les temperatures en descensu y l’aire con raches fuertes tendiendo a amainar al finar del día.
Mañana domingu alboreceremos con xarabatos y precipitaciones abondoses con nevaes importantes na cordelera perriba de los 400-500m, tendiendo a subir la cota a lu llargu del día y sobre too pela tarde que pue disparase hasta los 1300-1500m, muncho precuru colos ríos, tantu pequeños como grandes por mor del desxelu y les precipitaciones persistentes.
El llunes tenderán a remitir y puen abrise dellos claros que van afianzase’l martes pero too indica qu’una nueva entrada de vientu de componente noroeste mos pue volver apurrir de cara al miércoles y xueves , precipitaciones, descensu de les temperatures y nevaes de nuevu na cordelera, pero esto yá lu diremos viendo.
Cuidadin coles carreteres, nun solo pola nieve y l’agua si non tamiérn pol xarazu y el granizu. Que paséis un bon sábadu collacies ya collacios.

 

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *