El Día Mundial de la Televisión celebra’l 21 de payares. Foi proclamáu en 1996 pola Asamblea Xeneral de les Naciones Xuníes coles mires de promover l’intercambiu mundial de programes sobro paz, seguridá, desenvolvimientu económicu y cuestiones sociales y culturales.
El 21 de payares de 1996 celebróse’l primer Foru Mundial de la Televisión impulsáu pola Organización de les Naciones Xuníes (ONU). Nesti foru aldericáronse y buscáronse puntos de cooperación para la creación de programes basaos en paz, cultura, desenvolvimientu y seguridá. Dende esi momentu, cada 21 de payares conmemora’l Día Mundial de la Televisión.
L’apaición de la televisión como mediu de comunicación y d’entretenimientu foi un finxu na hestoria yá que los espectadores pasaron de solo escuchar voces na radio a ver n’imaxe y en movimientu a los presentadores, actores y comunicadores de la dómina. Anque dambos medios de comunicación siguieron coesistiendo, la televisión o tv (términu heredáu del vocablu anglosaxón) consiguió axuntar a millones de persones nuna sola emisión.
A empiezos del sieglu XIX, surdieron los primeros prototipos de televisiones, pero nun foi hasta finales de la década de los años 20 cuando se realizó la primer tresmisión d’una imaxe en movimientu. Nos años 30, la televisión foise consolidando y grandes corporaciones que conocemos anguaño empecipiaron les sos emisiones como, por casu, la BBC. Toos estos fechos marcaron l’orixe de la televisión, anque foi en blancu y negru y nun tuviera tan estendíu’l so usu.
La hestoria de la televisión foi evolucionando col tiempu y pasó de ser un mediu pa unos pocos a un mediu de mases. Les primeres emisiones yeren puramente informatives y esistía la desconexón. A partir de la década de los 60 y 70, l’entretenimientu abrió pasu y les televisiones espublizaben programación les 24 hores del día, los siete díes de la selmana.
Anguaño, les plataformes de pagu son les grandes competidores de la televisión, parte de los sos espectadores treslladáronse a estos nuevos espacios nos que consumir conteníu audiovisual cuando y onde quieran.
