Publicado en Deportes

La Vuelta usa por fin la toponimia oficial asturiana

Un añu más Asturies va ser protagonista en La Vuelta, con dos finales d’etapa, en los Llagos d’Enol y La Ercina y n’El Gamoniteiru, que s’estrena na carrera ciclista. Esti xueves presentóse’l percorríu definitivu cola novedá de que’l llibru de ruta respeta per primer vegada la toponimia tradicional asturiana, la única oficial.

La Conseyería de Cultura, Política Llingüística y Turismu algamó d’Unipublic, empresa organizadora de La Vuelta, esta vieya reivindicación de la direición xeneral que nun s’executaba pola pasividá d’Industria, departamentu onde taba enantes Turismu. Baxo’l mandu de Berta Piñán consiguióse l’añu pasáu que los llugares que yeren salida y llegada d’etapa incluyeran la toponimia asturiana, y pa ésti por fin la carrera incorpora tolos nomes oficiales nel llibru de ruta, al igual que fai cola gallega y la valenciana.

Asina, Mieres del Camín, Caranga Riba o La Pola apaecen col so únicu nome oficial, qu’en dellos casos ye billingüe como A Veiga/Vegadeo, Belmonte/Balmonte o San Xuan/San Juan de Beleño. Tamién se respeta el topónimu de los altos pelos que van pasar los ciclistes, cola esceición única de los Llagos d’Enol y La Ercina, onde se caltién el ‘Lagos de Covadonga’.

Les etapes

La Vuelta, con final esti añu en Santiago de Compostela por mor del Xacobéu, va llegar a Asturies na selmana última, polo que va ser decisiva na carrera. El pelotón va entrar per Unquera’l miércoles 1 de setiembre, na decimosesta etapa, pa tener final en Los Llagos tres dos pasos per La Collada Llomena.

Al día siguiente va tener llugar la etapa más esperada, la que va estrenar El Gamoniteiru. La salida va ser en Salas con salida hacia’l Puertu San Ḷḷaurienzu pa xubir darréu La Cobertoria y la Segá y finar nel duru altu asitiáu a 1.772 metros.

En direición al occidente, los ciclistes van tomar salida en Tapia pa xirar contra l’interior n’A Veiga hasta Os Ozcos con pasu pel Alto da Sela d’Entorcisa, l’Alto la Garganta y l’Alto de Barbeitos, y finar en Galicia, en Monforte de Lemos. Namái quedaríen dos etapes pa llegar a Santiago.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *