Publicado en TIEMPU

Batallón de borrasques: fríu y agua para ratu n’España

VIENRES 18 DE PAYARES DEL 2022, ESTÁU DEL TIEMPU Y PREDICIÓN.
Bonos díes, bona xente.
Alborecemos col cielu nuboso y dalguna gotera con unes temperatures que tan alrodiu de los 9ºC, rexistrándose nel puirtu Payares 1ºC.
Güei vamos entrar de sópitu al iviernu con un empeoramientu del tiempu gradual. Durante la mañana vamos tener intervalos nubosos entemecios ente dalgún glaru ya inclusu dalguna gotera o xarabatín feble más probable pela costa que sedrá de nieve ente los 1300-1500m., pa a partir de primera hora de la tarde, cola entrada d’aire fríu n’altor, entamar a desendolcase les nubes, reactivase los xarabatos y surdir tronaes con xarazu según vaya avanzando la tarde pel llitoral, baxando la nieve a los 1100-1300m con un descensu bultable de les temperatures y amás l’aire va soplar con fuercia en zones altes de montaña ya en puntos de la costa.
Durante’l prósimu riscar y hasta’l mediudía de mañana sábadu seguiremos con xarabatos frecuentes, tronaes que vendrán acompangaes con xarazu nel llitoral y nieve pela cordelera que pue baxar un poco más, a los 1000m durante les hores nuecherniegues, les temperatures siguen en dencensu anque al final del día subirán dalgo, asina como la cota de nieve que yá tará perriba de los 1500m.
El domingu templará con dalgo d’orpín a primera hora y apertura de claros a partir del mediudía, a la espera de un nuevu temporal de cara al llunes-martes que mos apurrirá precipitaciones abondoses, fuerte vientu, mui mala mar y nieve pela cordelera, pero esto yá lu diremos viendo.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *