Andrea Rodríguez Alonso, 18 años, convirtióse na primer muyer internacional con España na dilatada hestoria del Club Los Rápidos de Les Arriondes, entidá a la que ta venceyada desque s’empecipió nesa disciplina deportiva.
“Bien contenta coles resultancies yá que al ser la mio primera internacionalidá y meteme en finales foi un gran llogru”, señaló, pos, quedó cuarta en K-4 500 metros (tripulación na que tamién taba la cangueta Carla Corrolada) y octava en K-1 1.000 metros, nel so debú col equipu nacional español. “Ye unu prestu llegar a la selección española yá que nun club pequenu ye bien complicáu”, añedió.
Seis décades d’ésitos, dolce llustros d’hestoria, sesenta años de piragüismu. El 26 de xunu de 1961, echó a andar el Club Los Rápidos de Les Arriondes, santu y seña del deporte de la pala y la piragua na mítica ribera del Sella, siendo´l so primera mandatariu Ángel Cepa, que tenía de vicepresidente na xunta directiva a Ricardo Alonso Jardón; en calidá de secretariu a Antonio Oteru; y como tesoreru a Falu Cueto. Enforma trabayu, distintes xeneraciones, pero primero de too llevando con arguyu’l nome de Les Arriondes por tolos continentes gracies al bon faer de dirixentes y palistes.
Tres casi dos años ensin competiciones por causa de la pandemia pol Covid-19, lo que repercutió en los chavales que día ente día se baten el cobre nos entrenamientos, la postrera gran prestu para l’históricu club que preside dende 2014 Alberto Gutiérrez Cuadriello, curiosamente’l 26 de xunu de 2021, a primeres hora de la mañana, deparó Andrea Rodriguez, una moza forxada na factoría” d’El Barcu, tramu del Sella al so pasu pola capital de Parres, lluciendo la elástica de la selección nacional española nel Européu de Poznan (Polonia).
Escribir de Los Rabiones de Les Arriondes nesti aniversariu ye tamién faelo de les pruebes que lleven entamando, salvu pola incertidume de la pandemia que los llevó a suspendeles el cursu pasáu 2020 y, previsiblemente, quiciabes tamién esti 2021, na contorna del suroriente: Descenso Piloña-Sella, Descensu Alto Sella-Memorial Máximu Llamedo y Descensu Los Xironinos y Vieyes Glories-Memorial Emilio Llamedo Olivera. Caúnu d’elles col so peculariedad, pero toos elles curioses y espectaculares, onde s’entemecen nueves y non tan nueves.
