Publicado en Escritores, Política Llingüística, Premios

Ramón d’Andrés gana’l Premiu «Máximo Fuertes Acevedo» d’Ensayu

Ramón d’Andrés gana’l Premiu «Máximo Fuertes Acevedo» d’Ensayu cola obra «Una ciencia ensin enfotu».
El xuráu destaca la investigación y reflexón del trabayu, «un manual básicu p’abrir los güeyos de cualquiera, filólogu o non, sobre la ciencia y la non-ciencia que consumimos, asimilamos y creyemos al falar de llingües nel día a día».

Ramón d’Andrés ganó la edición ventena sétima del Premiu «Máximo Fuertes Acevedo» d’Ensayu en llingua asturiana que concede la Conseyería de Cultura, Política Llingüística y Turismu cola obra titulada Una ciencia ensin enfotu.

Los miembros del xuráu que falló’l premiu destacaron que’l trabayu de D’Andrés «ye un manual básicu p’abrir los güeyos de cualquiera, filólogu o non, sobre la ciencia y la non-ciencia que consumimos, asimilamos y creyemos al falar de llingües nel día a día». El xuráu valoró tamién el trabayu por «la investigación y reflexón» que reflexa. El premiu ta dotáu con 6.000 euros.

Nesta edición del Máximo Fuertes Acevedo, y baxo la presidencia del director xeneral de Política Llingüística, Antón García, el xuráu tuvo integráu poles filólogues y profesores Marta López y María Cueto, la escritora y tamién filóloga Beatriz Quintana, el filólogu Jorge Arturo Sierra y Xune Elipe, músicu, comunicador y ganador de la edición pasada del gallardón.

Ramón d’Andrés (Madrid, 1959), ye profesor titular de Filoloxía Española y Asturiana en la Universidá d’Uviéu. La so trayectoria investigadora vínculase a delles temátiques rellacionadas col asturianu. Fue redactor  de les Normes Ortográfiques y del Diccionariu de la Llingua Asturiana, obra de l’Academia de la Llingua Asturiana, de la que ye miembru de númberu.

Ente la obra tan estensa que publicó figuren títulos como Diccionariu temáticu de la Llingua asturiana (1991), Encuesta sociollingüística nuna parroquia asturiana (Deva-Xixón) (1993), Gramática práctica del asturiano (1997), Llingua y xuiciu (ganadora del Máximo Fuertes Acevedo en 1997),  Cuestiones d’asturianu normativu (2001-2003), Juicios sobre la lengua asturiana. Algunas cuestiones básicas acerca del debate lingüístico en Asturias (2002),  Gramática comparada de las lenguas ibéricas (2013) o Averamientu a la llingua asturiana (2019). También ye coautor, con Fernando Álvarez-Balbuena, Xosé Miguel Suárez y Miguel R. Monteavaro, de la obra Estudiu de la Transición Llingüística na zona Eo-Navia, Asturies (ETLEN).

 

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *