- Fonte: Turismu Asturies
- El Principáu participa esta selmana en trés feries especializaes en naturaleza y ecoturismu
Asturies consolida la so promoción como destín d’ecoturismu cola participación, esta selmana, en trés cites de calter internacional especializaes en turismu de naturaleza y aventura: la feria f.re.y, en Múnich (Alemaña), Fiets en Wandelbeurs, n’Utrecht (Países Baxos), y la Feria Internacional de Turismu Ornitolóxicu, nel Parque Natural de Monfragüe (Estremadura).
El Principáu va tar presente dende mañana na feria *f.re.y, l’eventu de viaxes y ociu más importante de Baviera. D’esta miente, va promocionase nel mercáu alemán, en collaboración con Turespaña, la ufierta asturiana venceyada al ciclismu, el camping y el deporte al campu. Amás, la feria Fiets en Wandelbeurs, d’Utrecht, ye una de les meyores feries de ciclismu y senderismu d’Europa y va acoyer, a partir del vienres, un espaciu dedicáu a Asturies.
Coles mesmes, el Principáu tamién va allegar a la Feria Internacional de Turismu Ornitolóxicu, que se va celebrar esta fin de selmana en el Parque Nacional de Monfragüe, n’Estremadura. Trátase de la feria decana nel so sector n’España y la segunda más importante d’Europa en turismu de naturaleza y observación d’aves.
Nesta 18ª edición de la feria estremeña, Asturies presenta un estand d’información turística y una axenda comercial dientro de la bolsa de contratación internacional que s’entama nel marcu d’esti eventu. Turismu alcordó cites con operadores de Portugal, Bélxica, Reinu Uníu y Países Baxos para dar a conocer les sos propuestes venceyaes cola observación d’aves y fauna autóctona, como l’osu pardu, ente otres actividaes d’interpretación de la naturaleza.
