Alborecemos con dalgo de nubosidá na metá norte d’Asturies, tando más escampláu pela cordelera onde ta xelando fonderamente, rexistrándose nel puirtu Payares -8,5ºC.
Güei entovía va caltenese dalgún intervalo de nubes baxes o estratificaes nel llitoral y fastera central asturiana, tando escampláu na cordelera y surocidente con unes temperatures másimes que van subir mui poco, dexándonos durante tol día un ambiente fríu ya ivernal. L’aire sedrá sele ya variable en xeneral con predominiu del nordés.
El prósimu riscar paez que tendremos el cielu más escampláu y les xelaes puen ser más xeneralizaes polo que alboreceremos baxu ceru na mayor parte d’Asturies. Durante’l día la llume del sol calecerá l’ambiente dalgo más qu’estos díes y pela tarde aumentará la nubosidá qu’impedirá que xele na alborada del miércoles, salvo nes zones de montaña.
El miércoles va dir disminuyendo la nubosidá pa quedar al finar el día escampláu cuando entamará a xelar de nuevu con unes temperatures másimes que vuelven a subir un poquiñín más.
Tantu’l xueves, vienres, sábadu y domingu va tar escampláu con xelaes pela nueche y temperatures másimes que nun calecerán muncho al mediudía.
