¿Ónde viven los osos?: un nuevu mapa del Principáu detalla los territorios oseros de les Cuenques
Ayer y L.lena son los conceyos con más presencia de la especie, que yá s’estiende a Redes y Morcín.
La guía didáctica ‘Turismu responsable en territorios oseros’, editada pola Fundación Oso Pardo, la Fundación Oso d’Asturies y Otea busca prevenir los alcuentros casuales con osos que puedan derivase del aumentu de población, asitiada en más de 350 exemplares nel Cordal Cantábricu. Estos datos son recibíos con arguyu per parte de la Fundación Oso Pardo, «por consiguir revertir la situación d’una especie que taba en peligru d’estinción», tal como apuntó’l so presidente, Guillermo Palomero.
La Conseyería de Mediu Natural y Planificación Rural del Principáu d’Asturies presentó les resultancies del estudiu sobro la población d’osu pardu realizáu en collaboración con Castiella y Llión, Galicia y Cantabria. La estimación poblacional, realizada con técniques xenómiques, refundia una resultancia de 370 exemplares (210 machos y 160 femes), distribuyíos ente la subpoblación occidental (250) y l’oriental (120).
Estos son los puntos del decálogu:
- Conocer y respetar la normativa llegal.
- Planiar los percorríos.
- Caminar de día y acompañaos.
- Nun abandonar basura nin restos de comida nel monte.
- Respetar la obligación d’arreyar a los perros nos espacios protexíos.
- Para la correcta observación de la fauna tien de recurrise a los servicios d’empreses y guíes profesionales. Respetar les actividaes ganaderes, agrícoles, les camperes, el ganáu y los animales de trabayu.
- Énte un alcuentru con un osu encamienta facese notar ensin perder de vista al animal.
- Nun compartir información sobro la localización concreta d’especies protexíes.
- Escoyer empreses del llugar.
Con esta guía los responsables del control del osu pardu pretenden prevenir posibles incidentes, antemanase a ellos y evitalos al traviés d’estos encamientos de turismu responsable.
