Publicado en Música

La Nueche Celta de Corao

Pegadiella de la II Nueche Celta de Corao (1984)

El 4 d’agostu de 1983 diba entamase nel pueblu cangués de Corao la I Nueche Celta, un festival que foi perimportante nel desenvolvimientu posterior de la música asturiana. Dos foron namás les ediciones que los organizadores pudieron llevar alantre, pero la repercusión mediática algamada foi pergrande y el so esquema y característiques dio orixe a una tradición de nueches celtes que s’espardió per tola xeografía asturiana.

Na primer edición actuaron el gaiteru asturianu José Remis Ovalle, l’arpista gallegu Emilio Cao, los grupos asturianos Noega y Beleño, los irlandeses Foxes y los bretones Bleizu Ruz. Na segunda (11 d’agostu de 1984) los participantes foron los asturianos Xuacu Amieva y Trasgu, los irlandeses Spanin Senach, los gallegos Brath y los madrilanos Labanda.

La grabación qu’asoleyamos de la I Nueche Celta de Corao fíxola Xune Elipe, que daquella collaboraba en Radio Popular d’Avilés con dellos programes, y pertenez a un reportaxe que s’emitió naquel momentu. La mesma rexistróse con un micrófonu d’ambiente y posteriormente foi llimpiada y dixitalizada. Nella pueden sentise un par de pieces interpretaes por Remis Ovalle (na que ye una de les sos últimes actuaciones), un tema del grupu Foxes, otru d’Emilio Cao, cinco de los xixoneses Noega (formación moza que foi de les primeres en facer folk al estilu célticu/atlánticu nel nuestru país), un par de pieces d’unos gaiteros cántabros -ensin identificar- que xubieron al escenariu espontáneamente, un tema de Bleizi Ruz (mui conocíos daquella nos ambientes folkis), cuatro d’unos primerizos Beleño y p’acabar una entrevista colos organizadores que falen de cómo surdió la idea de facer el festival y el so desarrollu.

P’afondar más no que foi y representó la Nueche Celta de Corao hai un par de materiales perinteresantes: «La Nueche Celta», d’Ignaciu Llope y «La Nueche Celta de Corao un “Woodstock” asturianu», de Javier Pedraces.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *