El médicu Mohamed Safa y FEDEMA, ganadores de los premios Carmen Ruiz-Tilve pola Paz. La entrega de los galardones va tener llugar el próximu día 30 de xineru so la presidencia de la escritora y cronista.
- Fonte: LNE / El Comercio / web cole / DIPTICU /
Un añu más, y va pola sesta edición, el xuráu del Premiu pola Paz Carmen Ruiz-Tilve axuntóse ayeri pela tarde nel colexu que lleva’l nome de la cronista oficial d’Uviéu pa escoyer a los nuevos ganadores, que van recibir el galardón mientres un actu’l próximu 30 de xineru nel mesmu centru escolar al que nun va faltar la profesora y alma mater.
Tres les oportunes deliberaciones, el médicu y activista Mohamed Safa y la Federación de Deportes pa Persones con Discapacidá Física del Principáu d’Asturies (Fedema) son los vencedores nes categoríes de persones ya instituciones, respeutivamente, tal que informó Adriana González, directora del colexu, ayeri pela tarde.
El xuráu resaltó que Safa, nacíu en Cixordania, «ye un defensor incansable de los derechos del pueblu palestín, faciendo visible la causa más allá del discursu oficial y de los grupos de poder sobre la tema». Foi delegáu del Frente pa la Lliberación de Palestina pa Galicia y el norte d’España mientres más de diez años y nel so currículum consten numberoses ponencies, participación en meses redondes y actos de divulgación y alderique, artículos y llibros publicaos sobre la situación de Palestina, nos qu’afonda nel conflictu como lu fai en ‘Palestina, un berru/gritu pola llibertá’, ‘La segunda Nakba palestina: El procesu de paz’, o ‘La revolución árabe’, ente otros, según valoraron los miembros del xuráu.
Valores. Tocantes a Fedema, destacaron que les actividaes que realicen favorecen l’autonomía de les persones que les realicen y crea, al traviés d’elles, un espaciu de convivencia ente families y redes de sofitu que faciliten el día ente día. Per otru llau, sorrayaron el so llabor en «el fomentu de la inclusión educativa y la prevención del abandonu escolar; y la tresmisión de valores como la tolerancia, el respetu y la solidaridá».
