Güei empieza l’iviernu meteorolóxicu que va ser más templáu de lo normal y con poques agües.
L’AEMET nun refuga qu’a lo llargo de la primer metá del iviernu llegue dalguna fola de fríu.
L’iviernu meteorolóxicu qu’empezó esti xueves, 1 d’avientu y que se va enllargar hasta’l 28 de febreru, podría ser más templáu de lo normal na mayor parte d’España menos en Canaries, pero solo va ser lluviosu nel Mediterráneu, Baleares y Canaries, mientres nel restu del país lo más probable ye que llueva per debaxo de los valores normales, según agora l’Axencia Estatal de Meteoroloxía (AEMET).
El voceru de l’AEMET, Rubén del Campu, indicó que lo más probable tocantes a les temperatures ye que nel so conxuntu esti trimestre sía más templáu de lo normal na mayor parte d’España, con una probabilidá del 40 per cientu bona parte de la Península y del 50 per cientu del Mediterráneu y Baleares de que les temperatures tean percima de lo habitual, frente a un 20-25 per cientu de probabilidaes de que les temperatures nel conxuntu del trimestre queden per debaxo de los valores habituales.
Tocantes a les precipitaciones, los escenarios son distintos en función de les distintes árees. De cuenta que na área mediterránea, Baleares y Canaries, agórase un iviernu probablemente más lluviosu de lo normal. Esi escenariu d’agües más abondoses de lo habitual ye d’un 40 a un 45 per cientu neses zones frente a un 20 o 25 per cientu de probabilidaes de que les agües sían más escases nel restu del país.
Sicasí, na mayor parte de la Península ye «minoritariu» l’escenariu qu’apunta agües más abondoses de lo normal, d’un 20 per cientu frente al 40 per cientu de probabilidaes de que l’iviernu sía más secu de lo normal.
