Publicado en Deportes, Xuegos Olímpicos

Primer oru olímpico femenín en BMX freestyle (estilu llibre)

La británica Charlotte Worthington llógralo con esta gran actuación. Ver videu.

La británica fixo honor a la emoción d’estrenar un deporte olímpico per primer vegada en Tokyo 2020 con una final épica, na que la estadounidense Hannah Roberts y la suiza Nikita Dukarroz tamién tuvieron al altor.

Na modalidá BMX Freestyle, los ciclistes realicen distintos tipos de reblincaes o trucos, nun parque con torgues como parés, caxones y columnes en dos rondes de 60 segundos, que se puntúen de forma independiente en función de distintos aspectos como la dificultá, la orixinalidá, la execución, l’altor alcanzáu y la creatividá. 

Con un inconestable exerciciu nel segundu run, incluyendo unu cucurrabucu escontra tras con xiru de la bicicleta nel aire (un ‘backflip 360º), un trucu que nenguna otra muyer fixera hasta agora en competición, Worthington llogró una puntuación de 97,50 y superó los 96,10 puntos de Roberts.

Cuando en 2017 el Comité Olímpicu incluyó’l BMX freestyle para los Xuegos de Tokyo 2020, Worthington trabayaba como cocinera na so Mánchester natal. La británica de 25 años dexó’l trabayu pola bicicleta, y en trés años, yá yera campeona europea de freestyle park, y la primer muyer británica en ganar una medaya a nivel mundial en Chengdu. Agora ye la primera en ganar una medaya olímpica d’oru en BMX Freestyle.


El BMX tien los sos oríxenes na cultura de carreres qu’esistía en California a mediaos de los 70. Los neños, inspiraos polos pilotos de motocross, empezaron a asonsañar coles sos bicicletes los trucos que realizaben nel aire. Dende aquellos empiezos, camudó hasta convertise nun deporte popular gracies a la gran cobertoria televisiva que tien, lo que-y dio reconocencia en tol mundu gracies a los Campeonatos Mundiales que, agora, apuéstense añalmente.

Nos Xuegos de Tokio 2020 los participantes van competir na disciplina de park, que implica que los participantes executen trucos en torgues como parés, caxones y columnes. En 60 segundos, los riders van esibir les sos habilidaes y trucos acrobáticos. Estos puntúense en base a distintos aspeutos, ente los que s’inclúin la dificultá, la orixinalidá, la execución, l’altor alcanzáu y la creatividá.

El BMX freestyle (estilu llibre) va faer el so debú Olímpicu en Tokio 2020, lo que va dar aire fresco y un espíritu xuvenil al programa Olímpicu.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *