Publicado en Colexu

El legáu d’una gran maestra

La directora del Carmen Ruiz-Tilve, Maite Fernández, xubilase con un homenaxe sorpresa a la so trayectoria: “Debémos-y los 11 años de vida que tien el centru”

Tou precuru foi poco, nel colexu Carmen Ruiz-Tilve, por que la sorpresa siguiera’l so cursu. El día d’Añu Nuevu l’actual directora, Maite Fernández, dexará un legáu de más d’una década de docencia a Andriana González y dende el centru, del que tomó les riendes dende la so apertura, quixeron rindir homenaxe a esta trayectoria. A les 10.30 de la mañana, taben citaos padres, familiares, profesores y la mesma Ruiz-Tilve na biblioteca del colexu, que d’equí p’arriba va llevar el nome de la casi yá xubilada. “Debémos-y los 11 años de vida que tien el colexu”, coinciden.

Hai un mural apináu d’alcordances, dos ramos de flores en nome de La Corredoria y los alumnos, una placa conmemorativa y flaxes de cámares esperando. Maite entra na sala, ensin saber por qué los sos compañeros fixéron-y abandonar l’aula onde impartía clase, y d’improvistu envolubrase d’una folada d’aplausos. “Nun esperaba nada”, algama a dicir ente dalguna qu’otra llarimina: “cómo m’engañastis”.

Primero fúndese nun abrazu con Ruiz Tilve, cronista oficial d’Uviéu, quien diz “nun podía faltar güei” y declara que conoz a la xerente desque empezó’l so llabor y almira el camín pol qu’empunxo al centru: “Tien muncho calter, daqué sirviólu pa llegar hasta equí, siempres cola mirada puesta nos neños”.

Güei, tou son afalagos y xestos de ciñu. “La so alcordanza forma parte de los cimientos y l’esencia del colexu. Carmen Ruiz-Tilve y Maite Fernández son conceutos imposibles d’entender l’unu ensin l’otru”, diz Pili Suarez del AMPA.

Tres 23 años como maestra, la galardonada atreviose a ponese al mandu del “acabante estrenar” centru qu’enllenó con proyectos hasta l’últimu momentu, y entá-y queden 9 díes… “Foi bien trabayosu. Camudamos equí en San Valentín y foi amor a la primer vista, nun teníamos medios pero sí munches ganes de faer coses”, esplica Fernández.

Anque los neños crecieron con más rapidez que los propósitos y viéronse 400 nun espaciu para 200. Ensin tirar la toballa, la cosa foi saliendo adelantre: trabayu por proyectu, menos llibros y más esperiencies para los más pequenos, premios de la paz, ayuda a la economía del distritu, y muncha capacidá d’atención, tal como ella resume: “na placa de dirección tamién tendría de poner consultoriu”.

Esti legáu nun termina ende, anque dexa’l llistón bien alto, según reconoz la futura muyer al cargu Adriana González: “La idea ye siguir coles pieces d’este puzzle que se foi construyendo”. Para ello cunta col equipu al completu, que nun faltaron a la cita: conserxe, personal de llimpieza, maestros, estudiantes, padres y madres. Cada unu tien un papel fundamental, según asegura. Tampoco s’escaez a les persones qu’apaecen nes semeyes del gran cartelu y anque yá nun tán, caltiénense presentes nos frutos del árbol que creció esta trayectoria.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *