Publicado en NATURA, Sin categoría, Xixón

Un paséu de mano de Peppa Pig

La famosa gochina y la so televisiva familia van acompañar, mientres el mes d’agostu, a les families que decidan visitar el Xardín Botánicu Atlánticu. El Xardín Botánicu de Xixón ta de norabona. Y ye que Peppa Pig y la so familia decidieron braniar nos sos rincones mientres tou agostio. Info  / Facebook / Instagram /

Esta visita englobase nun tour por cuatro de los principales xardinos botánicos españoles, yá que al pie de Xixón, Peppa visitó’l de Valencia en xunetu y nos próximos meses va faer lo mesmo en Córdoba y Madrid.

(Fotografíes: D.F)

En cada xardín los visitantes van recibir un cuadiernu unificáu colos mapes de cada centru y l’allugamientu de cada figura, con actividaes propuestes para realizar dientro y fora de cada instalación. L’oxetivu nun ye nin más nin menos qu’ufiertar a los neños una forma lúdica de conocer los rincones más guapos de los xardinos. Amás, al terminar la visita, pueden cuntar les abeyes qu’hai escondíes nel cuadiernu y mandar la respuesta a la organización para entrar nun sortéu d’un premiu con distintos artículos de merchandising protagonizaos pola gochina más famosa de la televisión.

La iniciativa, que yá se celebró nel Xardín Botánicu de Madrid l’añu pasáu, ye una acción conxunta del JBA con Entertainment One, empresa productora de Peppa Pig, col fin d’averar la naturaleza d’una forma risondera a los neños. Nesti aspeutu, Chus Barrientos, Responsable de Dinamización del Xardín Botánicu, destaca la profesionalidá y l’impecable forma de trabayar de la productora: “Tou foi consensuáu, tuvieron pindios de tolos detalles y facilitáronnos enforma les coses”. Barrientos, amás, fai fincapié na importancia a nivel de publicidá para’l botánicu xixonés d’esta iniciativa yá que “los cuadiernos son iguales para tolos xardinos, polo qu’el logo del JBA va vese en miles de copies partíos por toa España”.

El futuru del JBA

La visita de Peppa, cocinada dende va unos meses, ye un pasu más escontra la dirección que’l Botánicu quier marcar a partir d’este mesma seronda. Frente a una programación “más centrada n’eventos importantes, con una curva de visites con díes de muncha arribación y fines de selmana muncho más seles”, en palabres del mesmu Barrientos, “queremos apostar por más eventos pero más pequenos, que nos dexen un nivel de visites más estables”.

Nesta llínea señaló que la pasada primavera yá se fixo una esperiencia piloto con actividaes y talleres para tolos públicos con una acoyida “que nun esperábamos. Nótase que la xente tenía ganes de volver al Botánicu”. Tocantes a la instalación en sí, el Responsable de Dinamización comenta que “mientres los próximos meses va realizase una revisión completa de la eletricidá y el llume”, amás de qu’espera poder empezar coles necesaries obres de rehabilitación del centru por que la próxima primavera’l Xardín vuelva llucir como se merez.

Por A. Damián Fernández

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *