Alborecemos con delles nubes baxes na costa oriental asturiana y dalguna alta nel restu con unes temperatures que tan alrodiu de los 8ºC, rexistrándose nel puirtu Payares 1ºC.
Güei nel cielu vamos tener dalguna nube de retención na contorna de los cordales asturianos emburriaes pol vientu nordés que va soplar cafiante, sobre too nel llitoral onde la sensación térmica sedrá desagradable, nel restu predominará’l cielu poco nuboso, sicasí va tar empuercáu per dalguna nube alta con unes temperatures que descenderán llixeramente.
Mañana xueves aumentará la nubosidá y al finar el día pue cayer dalguna gotera en forma d’orpín , l’aire nordés seguirá molestu pela costa y les temperatures baxarán otra migallina más.
El vienres l’aire amenorgará y camudará a componente norte, apurriéndonos nubosidá abondosa que vendrá acompangada por orpinos y orbayos con unes temperatures que siguen baxando, sobre too en zones de montaña.
El sábadu va tar revueltu col cielu nuboso, precipitaciones febles en forma d’orpín pela mañana y cola posibilidá de dalgún xarabatu de calter tormentosu pela tarde, la cota de nieve rondará los 1800m y les temperatures sedrán baxes pa la época na que mos atopamos.
El domingu meyora dalgo con menos nubes baxes, dalgo de sol pela mañana, ascensu moderáu de les temperatures pero con xarabatos de calter tormentosu pela tarde febles ya dispersos.
