- Fonte: La Voz de Asturias /
Dos rames de la familia real llucharon pol poder y por dos concepciones distintes del reinu d’Asturies. Con frecuencia de forma popular numbérense les capitales» del antiguu reinu d’Asturies como una sucesión de Cangues d’Onís, a Pravia y finalmente a Uviéu.
Pero esi treslláu nun ye tan senciellu, de mano les sedes de la corte nun yeren «capitales» nel sentíu que-y damos anguaño, pero amás nel casu d’Asturies esta secuencia oculta daqué más qu’un treslláu de poblaciones, nella ta engarzada una llarga llucha ente dos rames/cañes familiares por afitase nel tronu, xuna batalla que s’enllarga mientres xeneraciones y non yá (anque foi bien importante) pol puru exerciciu del poder sinón tamién ente dos visiones ideolóxiques distintes del reinu, de la so relación col pasáu peninsular y les sos relaciones con Europa.
El reinu d’Asturies tien el so núcleu primordial no que güei ye l’oriente de la comunidá y parte de la vecina de Cantabria, l’antigua civitas de Vadinia, y hai xuna alianza que se cierra con matrimonios ente dos families poderoses, la del primer rei Pelayo y la del duque Pedro de Cantabria, ye’l matrimoniu d’Ermesinda y Alfonso. Ye por eso qu’Alfonso va ser rei cuando Favila muerra a manos d’osu. Y el cuartu rei va ser el so fíu, Fruela I. Pero nesi reináu la trama complícase: Fruela sufri más d’una conxura palaciega (morrió asesináu) y nun se sabe perbién qué pasó de siguío pero’l so fíu (el futuru Alfonso II, que va ser bien importante nesta hestoria) nun-y asocedió nel tronu. Fízolo Aurelio, por apenes seis años, y dempués foi coronáu Silu. Y equí empieza la nuesa hestoria porque con él treslládase la corte a Pravia.
Silu ye rei porque ta casáu con Adosinda (hermana de Fruela I y nieta de Pelayo) pero yá nun ye un señor procedente del núcleu orixinal oriental del reinu, sinón del oeste, de los pésicos y atópase más cómodu (y probablemente más seguru) en Pravia, na antigua Flavionavia ¿ye esa la nueva capital del reinu? En realidá non «pal reinu ástur el términu capital’ puede llevar a tracamundiu, porque remembra xuna idea de centralidad política, alministrativa o económica que casa mal cola realidá d’aquella dómina.
A lo llargo y anchu del reinu esisten diversos centros de poder local o comarcal que tienen un pesu importante, y l’exa de la política altomedieval consiste precisamente na interacción ente l’autoridá rexia y esos poderes locales. Por eso los reis tán obligaos a movese dacuando, acompañaos d’un séquitu de fieles, por toa xuna rede de palacios, castiellos, monesterios y ciudaes que, por dicir, dibuxa l’algame del poder rexio sobro’l mapa»; esplica’l profesor Raúl González, de la Universidá de Llión. «Más que xuna ‘capital’ en sentíu modernu, ye un espaciu simbólicu y ceremonial, verdaderu corazón ritual de la comunidá política ástur. L’espectáculu del poder desenvuelvese nella como en nenguna otra parte, pos ellí asítiase con especial intensidá la memoria de la familia real y ellí celébrense les principales asamblees aristocrátiques qu’articulen la vida política, xudicial y relixosa del reinu».
Del reináu de Silu cónstanos una obra fascinantes, la piedra llaberíntica topada en Santianes, del que namá nos queda un estace pero que yera una llosa, con una S nel centru y un testu que puede lleese en toes direcciones diciendo «Silu princeps fecit» (Fíxola’l príncipe Silu).
