Güei, 8 d’abril, vamos ser testigos d’un eclís solar total. Esti fenómenu asocede cuando la Lluna asitiase ente’l Sol y la Tierra proxectando la so solombra sobro’l nuesu planeta, de tala manera que, dacuando, produzse la escuridá total. En delles cultures esisten munchos mitos y supersticiones sobro los eclises solares.
Güei ye un día especial para los amantes de l’astronomía. Güei ye’l día del eclís solar total que podrá vese forma parcial dende les Isles Canaries y Galicia. Particularmente, nel estremu noroeste d’A Coruña y en Santa Cruz de Tenerife, espérase una visibilidá cercana o superior al 5%.
Gracies a internet, los más interesaos podrán siguilo «in streaming» dende delles páxines webs como’l portal de meteoroloxía canadiense The Weather Network o dende la web de la NASA onde, aparte, van haber comentarios de los más espertos na tema.
Agora bien, para entender qué ye un eclís, primero débense cumplir dos requisitos que los faen bien especiales. El primeru, ye que la Tierra y la Lluna tienen que tar perfectamente alliniaes, daqué que solo asocede cuando hai Lluna nueva o Lluna llena. El segundu requisitu ye que dambos astros tienen de tar alliniaos col Sol, daqué más complicáu.
Cuando’l nuesu satélite queda en mediu del Sol y la Tierra vemos un eclís solar, que son los que crean más mires y ye el que va asoceder güei mesmu. Per otru llau, cuando la Lluna queda detrás de la Tierra al respective de la nuesa estrella, ye un eclís llunar, perdiendo’l so rellumu por cuenta de la nuesa solombra proxectada, que ye’l qu’asocedió’l pasáu 25 de marzu. VIDEU
