Publicado en Día de...

Día Internacional de los Museos.

El MUXA ye’l muséu con más visitantes

Les entraes nes instalaciones asturianes superaron el mediu millón. Esti miércoles celébrase’l Día Internacional de los Museos.

Los museos asturianos recibieron l’añu pasáu 588.815 visitantes, un 72 por cientu más que nel 2020, cuando les restricciones sanitaries impuestes pola pandemia de COVID-19 condicionaron de manera importante’l volume d’entraes nos equipamientos. El Muséu del Xurásicu d’Asturies (MUXA) foi’l que tuvo más públicu, 127.320 persones, con muncha diferencia sobre’l segundu, el de Belles Artes, qu’algamó 75.170.

Los siguientes na llista son el de la Ilesia, con 72.414; el del Pueblu d’Asturies; con 63.545; y el Parque Arqueolóxicu-Natural de la Campa Torres, con 59.903. La rede de centros públicos y privaos del país conmemora güei, 18 de mayu, el Día Internacional de los Museos con una programación qu’incluye más de 80 actividaes y que va allargase hasta la fin de selmana.

Talleres, visites guiaes, alcuentros, esposiciones, conciertos o presentaciones de llibros son dalgunes de les propuestes diseñaes pa tolos públicos. Esta celebración promuévela’l Conseyu Internacional de Museos (ICOM, poles sos sigles n’inglés) pa sensibilizar a la ciudadanía de la importancia que tienen estes instalaciones pa “l’arriquecimientu de cultures, l’avance del entendimientu mutuu, la cooperación y la paz ente los pueblos”.

Na imaxe, dinosaurios nel xardín del muséu asitiáu en Colunga. Semeya propiedá del MUXA.

 

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *