Publicado en Artículos

Sociedá Astur n´Edá del Fierru

La vida destos pueblus yera enforma austera ya tá perbien descrita nos sos prencipales carauteristicas por Estrabón nel so llibru terceru, ya del que n’outra entrada, vamos poner una reseña so la so vida.

“Ente los pueblus qu’habitan sol riu Dueru falan qu’ay dalgunos que viven al mou lacónicu, ya usan aceite, ya calecen los sos cacíus con piedras enroxecias al fueu, bañanse nel agua fria ya nun faen namás qu’una xintada al día, curtia ya cencieḷḷa.

Tous estus habitantes de la montaña son sobrius, nun beben sinon agua ya duermen nel suelu, ḷḷevan pelos ḷḷargus al mou femenin, anque pa combatir cinxinse la tiesta con una banda.

Xintan principalmente carne de castrón, ya los dioses sacrifican castrones ya tamién cautivos ya caballos, suelen facer hecatombes de cada clas de victima, al mou griegu, ya por falalu al mou Pindaros: inmolan tou un cientu.

Prautican lluchas xinnasticas, hoplíticu (combate zarrau) ya hípicas, exercitandose pal puxilatu, la carrera las escaramuzas ya las bataḷḷas campales.

Nas tres cuartas partes del añu nun xintan namás que abiyotas, que secanlas trituranlas ya muelenlas pa facer pan, que pué guardase enforma tiempu, beben Zythos (sidra) yal vinu qu’arralez, cuandu lo llogran gastanlu aína nos grandes ḷḷacuaes familiares.

En ḷḷugar d’aceite usen manteiga, xintan sentaus solos bancus feichus alridiu la pared, allineandose según l’edá, los alimentos faenlos circular de mano en mano mientres beben, baiḷḷan los omes al son de flautas ya trompetas, saltandu no altu ya caḷḷendo en xenuflexión.

Na Bastetania las muḷḷeres baiḷḷan entemecíes colos omes, xunius unos ya outrus pelas manos. Los omes van vistius de prietu ḷḷevandu’l sayu la mayoria, con eḷḷos duermen nos llechus de paxa, usen vasos llabraus de madera, como los celtas, las muḷḷeres ḷḷevan los sos sayus con adornos florales.

/

Nel interior, en ḷḷugar de moneda faen trueque de especies o danyos llaminas de plata recortadas, a los criminales despeñanlos, ya los parricidas lapidanlos sacandoyos fora las ḷḷindes de la so patria o ciudá, casanse al mou griegu.

Los enfermos, como faciase angüañu ente los Asirios, ponenlos nos caminos pá ser curaos per los que ufrieran l’enfermedá, enantes de la ḷḷegada de Bruto nun tenian más que barcas de cueru pá salear pelos estuarios ya ḷḷagunas del pais, poro güei usen baxeles feichus de troncu d’árbol, anque sea per raru, la sal ye purpurea, poro faese blanca al molela.

Asina viven estos montañeses, que como falaba son los qu’habitan nal llau septentrional d’Iberia, los Astures, Cantabros ya Galaicos, fasta los Vascones ya’l Pirineu tous los cualos tienen’l mesmu mou de vivir, podria facer la llista per ḷḷarga poro renunciu a una descripción aburria, a naide le prestaria oir falar de los Pleutaros, Bardulos, Allóbriges ya outrus nomes menos guapus ya más ignoraos.

La so rudez ya xabacismo nun se deben solu a las costumes guerreras, sinón tamién al so alloñamientu, per los caminos de la mar ya terrestres que conducen a esti terren son per ḷḷargus ya esta dificultá de comunicaciones fizolus escarecer de toa sociabilidá ya toa humanidá. Sicasi güei’l mal ye menor gracies a la paz ya la ḷḷegá de los romanos, eḷḷí onde estes dos ventaxes nun enfusanon caltienen un carauter más feroz ya brutal ensin tener en cuenta qu’esta disposición natural ente la mayoria d’eḷḷos pudo aumentase per causa de l’asperez del pais yal del clima.

Mas, repito, toas estes guerras tán güei día acabaes, los mesmus Cántabros, que de tous estus pueblus yeran los más enferronaus a los sos hábitos de bandidaxe, asina como las tribus vecinas, foron amenorgaes por Augustu, ya agora en ḷḷugar de desvastar, como enantes, las tierras de los aliaus del pueblu romanu, ḷḷeven las sos armas al serviciu de los mesmos romanos, como asoceden precisamente colos Koniakos ya colos Plentouisos qu’habiten nas fontes del Ebro. Tiberiu, amás, per l’indicación d’Augustu, so predecesor, tién mandau a estas tierras un cuerpo de tres lexiones, que la so presencia ya fizo munchu nun soulu pacificando sinón tamién civilizando una parte d’estos pueblus”.

Sicasi, nas costas septentrionales riberanes de l’océanu escarecen d’eḷḷas a causa del friu, nel restu del llitoral, más que neglixencia de los omes, que viven ensin esmoliciones, porque dexan trescurrir la so vida ensin más apetencia que lo más imprescindible ya la satisfación de los sos instintos brutales. Si nun se quier interpretar como un reximen confortante de la so vida que se ḷḷaven colos orinos guardaos mientres un tiempu en cisternes ya que tantu omes como muḷḷeres d’estus pueblus frotanse los dientes con eḷḷos, como faen los Cantabros ya los sos vecinos.

Estu, ya’l dormir nel suelu en común, ye propiu de los Iberos ya los Celtas, según dalgún autor, los Galaicos son ateos, poro non asina los Celtíberos ya los outrus pueblus que ḷḷindan con eḷḷos pel norte, tous los cualos tienen cierta divinidá innominada, a la que nas nuechis de ḷḷuna ḷḷena, rinden cultu baiḷḷando fasta l’amanecer, ante las puertes de las sos casas. Los Velones, que foron los primerus que compartieron colos romanos vida de campamentu, agüeyaron una vegá a ciertus centuriones dir ya venir na guardia, como pasiandose, creyeron que taben llocus ya mandabanyos palas tiendas, nun concebian outra aptitú que la de tar tranquilamente sentaus o la de combatir.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *