L’horru ye consideráu polos emigrantes como un símbolu d’Asturies.
Munchos centros asturianos tienen unu nes sos instalaciones: La Plata, Bonos Aires, Montevideo, Caracas, Barcelona, etc. Tienenlos tamién en L’Habana. El de México tien unu nel Club Campestre Ecolóxicu, en Cuautla (estáu de Morelos), y otru nel Parque Asturies, en Tlalpan, Ciudá de México, que ye una gran instalación na que pueden practicase tolos deportes conocíos. Esti últimu horru, construyíu en 2005, ta tratáu como un monumentu que s’alza n’homenaxe a la tierra d’orixe y ta arrodiáu d’una cadena para ser contempláu ensin averase. Ye otra amuesa del horru convertíu en seña d’identidá d’Asturies.
