Publicado en Alcuentru, Arte

Uviéu celebra del 4 al 14 de xunu la I Selmana Profesional de les Artes

El programa, presentáu en La Vega, l’escenariu principal del ciclu, entama mañana vienres, a les 21: 30 de la nueche, con unu de los maestros del arte sonoro, el precursor d’esta disciplina a nivel mundial, Llorenç Barber, que tañerá la campana en funcionamientu más antigua del mundu, la ‘Wamba’ de la Catedral. El sábadu, el maestru Antonio López, consideráu unu de los meyores pintores realistes vivos del mundu va ufiertar una charra na Filarmónica.

Del 4 al 14 de xunu, Uviéu “va acoyer una actividá inédita, que va axuntar, mientres diez díes, a destacaos profesionales de les artes plástiques y del diseñu, artistes locales y de fora, y que va convertir a Uviéu nel  puntu d’alcuentru de la excelencia de les artes plástiques, atrévome a dicir, de too el país, per unos díes. Lo que va asoceder n’Uviéu a partir del vienres nun tien precedentes nesta ciudá. Consiguir qu’una capital d’una provincia pequena, como ye la nuesa, que nun ye Madrid, nin Barcelona nin Bilbao, vaya a consiguir acoyer en distintos escenarios a dalgunos de les pata negra’ de les artes plástiques d’España y del mundu ye un verdaderu finxu na hestoria de la programación cultural uvieina”.

Esti próximu vienres, adelantró’l conceyal presentador del programa, Costillas, “a les 21: 30 de la nueche, unu de los maestros del arte sonoro, el precursor d’esta disciplina a nivel mundial, Llorenç Barber, va dar un conciertu únicu n’Uviéu, faciendo sonar la campana en funcionamientu más antigua del mundu, la ‘Wamba’ de la Catedral pal públicu que va poder siguilo dende la plaza. Y el sábadu vamos poder escuchar al que ta consideráu unu de los meyores pintores realistes vivos del mundu, el maestru Antonio López, que nun se prodiga n’actos de nengún tipu dende fai enforma tiempu, y que a la llamada de Marta Fermín por que viniera a Uviéu a participar nesta Selmana del Arte, dixo SÍ. Esti sábadu na Filarmónica vamos poder asistir a la conferencia d’una de les lleendes vives de la pintura realista. Pero ye que tamién va tar n’Uviéu una de les meyores galeríes d’artes del mundu, l’australiana Retros-pect Galleries, que nos ufiertará una colección d’escultura y pintura d’artistes belgues, estadounidenses y mexicanes. Ye una de les galeríes más importantes d’Australia, qu’aprovecha’l so pasu per España para participar na Selmana, con una trayectoria que los llevó a les feries más importantes del mundu como la ART MIAMI, Shanghai Contemporary Art Fair, Korean International Art Fair  o la Art Toronto”.

La Selmana de les Artes, detalló’l conceyal de Cultura “va tener dellos escenarios singulares, únicos, nestos diez díes. Una parte importante de les localizaciones nes que contemplar delles colecciones que los artistes crearon especialmente para esta actividá podrán vese equí, na Fábrica de la Vega, en cuatro de les sos naves más importantes. Ello ye que nestos diez díes podrán vese n’Uviéu obres y pieces que munchos de los artistes participantes crearon espresamente para homenaxar la Fábrica d’Armes y el llabor que fixo mientres tantos años na ciudá. Concretamente falamos de pieces de los artistes Carlos Corones, Lisardo Menéndez Mines, Pablo de Lillo…. Y artistes locales como Breza Cechini, Federico Granell, Faustino Ruiz de la Peña, Fernanda Álvarez, Cecille Brillet, Muel de Dios, Emma Bi o Mentxu Álvarez.

El restu d’allugamientos nes que se van desenvolver les actividaes van ser el Muséu de Belles Artes, el Muséu Arqueolóxicu d’Asturies, la plaza de Catedral d’Uviéu, el Seminariu, les galeríes d’arte de la ciudá, la Universidá d’Uviéu, el Teatru Filarmónica y el Colexu d’Abogaos”.

Esta ufierta cultural “ensin precedentes va cuntar como platos fuertes, yá lo diximos, cola presencia del pintor español Antonio López, autor, ente otres obres, del famosu oliu La familia de Juan Carlos I, que xeneró una enorme espectación al tardar venti años n’acabala. Otru de los grandes afitaos va ser el singular conciertu que va tener llugar na plaza de la Catedral cola campana Wamba, de la torre catedralicia, como preséu principal”, indicó Costillas. Y añedió: “la Fundación Municipal de Cultura lleva meses trabayando nesta ambiciosa programación que mientres diez díes va xunir arte, cultura, y tamién  empresa y gastronomía, yá que se trabaya de manera tresversal cola Asociación d’Hosteleros del Cascu Antiguu que van poner a disposición del públicu pinchos, tapes, menúes y cócteles diseñaos especialmente n’homenaxe a los distintos autores qu’esponen y vistan la ciudá. Quiero estimar a les entidaes que fixeron posible qu’esto vea la lluz, principalmente la Delegación de Defensa d’Asturies, que sigue dexando nos esti cortil cada vez que-yos presentamos un proyectu cultural que-yos gusta, tamién al Muséu de Belles Artes, al Colexu d’Abogaos d’Uviéu y a los Conceyos de Mieres y Avilés, a la Universidá d’Uviéu, ente otros”.

L’artista Marta Fermín, xestora de la I Selmana Profesional de les Artes d’Uviéu y presidenta de les Galeríes d’arte d’Asturies, estimó a Costillas “la oportunidá d’espresame como xestora y como artista”. “Esta Selmana”, indicó, “naz de la necesidá que tien el sector de que se reconoza’l nuesu trabayu. Nos últimos años, los artistes sentímonos casi como espectáculos. Precisábamos una sección que nos trata de manera profesional. Va Haber esposiciones, conferencies, talleres… Anque toos tenemos en mente a los dos grandes estrelles, Antonio López y Llorenç Barber, hai 52 artistes trabayando y un total de 150 profesionales. Nesti proyectu, el 90% ‘son de casa’.  El so trabayu ta remunerado y por eso la Selmana reivindica los derechos de los artistes. Ye daqué inéditu n’España”. Fermón esclarió que “el símbolu del ‘A’ presente nel diseñu de la Selmana escoyóse, per parte del so ceador, a partir  de la nuesa cadarma porque los artistes tamos fechos d’otra pasta. Una A d’homenaxe a la Fábrica d’armes, a la Fábrica d’Arte, una A d’amor y d’autor porque nos xunen más coses que nos dixebren”.

Fermín calificó’l conciertu de dende tolos campanarios del próximu vienres nun ye un fechu importante sinón nun fechu históricu” y animó a los ciudadanos a “participar na cai, asitiándose preferiblemente nes confluencias de les cais y nes terraces y azotees”.

Ubicaciones

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *