La boda vaqueira ye unu de los momentos más importantes de la cultura vaqueira. Los matrimonios mistos (vaqueiros y xaldos) yeren escasos, una y bones la condición de grupu minoritariu, marxináu y con una forma de vida distinta, pastoril y trashumante faía que nun abondaren esti tipu de relaciones.
Tou ello fomentó l’apaición d’una serie de pautes de conductes sociales y culturales propies que nos acontecimientos importantes de la vida del vaqueiru, como’l matrimoniu, manifiestense na participación de too el colectivu social n’una gran amuesa de solidaridá grupal y na que s’asoceden dellos momentos importantes.
De primeres, antes de la boda vaqueira, asocede’l conciertu. El padre del noviu va a casa de la novia y ellí determinar y regatia lo que cada cónyuge hai de llevar al matrimoniu. Darréu, el día de la boda, la comitiva formada polos novios, padrinos ya invitaos, va precedida de la dote llevada nun carru del país tiráu por dos vaques. Nél llevaba un bagul con ropa blanco, arrodiáu de dellos sacos de trigu y los enseres que componíen la dote. Enriba de too va la cama matrimonial, na que resalten los encaxes de les sábanes, de les almaes y los primores de la colcha. Y a lo último, la cesta de la madrina, afatada con llazos que contienen pan, mantega, güevos y duces.
Tres la boda, tien llugar la típica comida vaqueira, compuesta por xamón cocíu, choscu, empanada, bollu preñáu, frixuelos, nata montada de les brañes y café de pucheru.
La Vaqueirada
Esta tradición de la cultura vaqueira yá nun ye común nos nuesos díes. Sicasí, pa recordalo y caltenelo, cada últimu domingu de xunetu celébrase na braña d’Aristébanu, la frontera ente los conceyos de Valdés y Tinéu, El Festival Vaqueiru y de La Vaqueirada. Danse cita nel campu, alredor de la Capiya de La Divina Pastora, novios y familiares, vaqueiros y turistes, asturianos y estranxeros. Y ye dignu mentar el pintorescu espectáculu de la comitiva Vaqueira, la comida campestre, el concursu de coros y dances Vaqueires sobre improvisáu tablaos, y les coples y romances del más vivu sabor brañeril.
Sicasí, la cultura vaqueira nun ye solo esto y tien muncho más, que puedes afayar. por casu, con una ruta pol corazón de les sos brañes.
