«LA FAUNA SALVAXE D’ASTURIES
Y EL TRABAYU VETERINARIU»
Y EL TRABAYU VETERINARIU»
- Llugar: Atenéu Obreru de Xixón / Antigua Escuela de Comerciu, 2ª planta. / 19:00 hores.
- Asociación Ástura / Facebook / Twitter /
Asturies ye un territoriu con una gran diversidá de fauna montiega, con especies bien conocíes pol públicu xeneral (como l’osu pardu o’l llobu ibéricu), otres poco conocíes fuera d’Asturies, pero que xeneren gran interés ente los espertos (como’l gallu montés cantábricu), ya inclusive otres práuticamente desconocíes (como’l desmán ibéricu). Y ente toos ellos, cientos d’especies que presten enforma a los biólogos y naturalistes: utre alleonada, curuxa real, zapiquera, águila real, cárabu, fuina, ferre, azor, numberoses aves migratories (mabees, mazcatos, painos, delles llimícoles…).
La conferencia quier desplicar la increyible biodiversidá que mos arrodia y el trabayu de los profesionales del sector, centrándonos en mamíferos y aves y poniendo especial enfotu nuna de les especies más emblemátiques y desconocíes fuera d’Asturies: el gallu montés cantábricu, ave cola que la ponente trabayó a lo llargo de 15 años, especialmente dende’l proyeutu de cría en cautividá, más tol trabayu de campu que se fae cola especie nel Cordal Cantábricu.
María Suárez Álvarez ye veterinaria de fauna salvaxe, doctora y bióloga especializada en reproducción animal. Trabayó con fauna montiega dende 1999, coordinando proyeutos de caltenimientu «ex situ» d’especies protexíes, como asesora en temes reproductivos, como veterinaria en centros de rescate y rehabilitación de fauna salvaxe, dirixendo investigaciones sobre’l comportamientu animal y participando na ellaboración de censos, captures y radiomarcaxe, asina como tol trabayu de campu venceyáu a estes actividaes.
• Trabayó con fauna salvaxe n’Europa, orangutanes y loris galbaniegos n’Asia, goriles de llanura occidental n’África y delles especies monteses en Costa Rica.
• El so principal interés ye’l conservacionismu, amestando nel so trabayu la esperiencia n’investigación científica col trabayu de campu y la clínica.
• Dende hai 15 años collabora col Gobiernu del Principáu d’Asturies como veterinaria, participando na Rede d’Alerta Sanitaria, nel Centru de Rehabilitación de Fauna montiega, y realizando la xestión y supervisión científica y téunica del Centru de Cría y Reserva Xenética del Gallu Montés Cantábricu, como veterinaria y responsable del proyeutu de cría en cautividá nos sos primeros años.
• Amás de col gallu montés trabayó col llobu ibéricu, osu pardu, gatu montés, fuina… y numberoses especies d’aves monteses. Nos postreros 4 años ye asesora del Ministeriu pa la Transición Ecolóxica en temes reproductivos y veterinarios del proyeutu de caltenimientu «ex situ» del gallu montés.
