Publicado en TIEMPU

Estáu del tiempu Domingu 9 de xineru

Bonos díes, bona xente.
Alborecemos con cielu nuboso y temperatures suaves, alrodiu de los 16ºC, rexistrándose nel puirtu Payares 3,8ºC. Güei va caltenese la nubosidá abondosa sin malpenes precipitaciones pela mañana con tendencia a surdir y ser de calter moderáu al atapecer con unes temperatures que sedrán suaves y col vientu que va seguir soplando con raches mui fuertes en zones altes de montaña ya en puntos del llitoral.

Mañana llunes seguiremos col cielu nuboso pero sin malpenes precipitaciones, sicasí pue cayer dalguna gotera feble ya dispersa en forma d’orpín, amás amenorgará l’aire y les temperatures camudarán poco, calteniéndose un ambiente suave y afayaizu.
El martes los orbayos y orpinos van ser más frecuentes y abondosos con un llixeru descensu de les temperatures que fadrá que surda la nieve nes cumes más altes de la cordelera, rolando l’aire a lu llargu’l día a componente nordés.
El miércoles van remitir percompletu les precipitaciones y a pesar de l’apertura de dellos claros les temperatures van aniciar un bultable descensu, amás l’aire nordés va a baxar entovía más la sensación térmica, sobre too nel llitoral onde va soplar cafiantemente.
A partir del xueves y hasta nuevu avisu, el cielu va quedar escampláu con xelaes moderaes y xeneralizaes durante les nueches con temperatures másimes que malpenes algamarán los 10ºC y con mínimes perdebaxo de 0ºC na mayor parte d’Asturies.
Pa más alantre hai muncha indefinición ente los modelos meteorolóxicos pero nun sedría raru que la estabilidá anticiclónica se rompa con una gran iverniza, taremos sollertes ya informando que paséis un bon domingu collacies ya collacios.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *