Hestoria d’Asturies

Capítulu I: ¿Prehistoria d’Asturies?
Capítulu II: Los pueblos prerromanos
Capítulu III: Ástures y romanos
Capítulu IV: De los sieglos escuros a la invasión islámica
Capítulu V: El Reinu de los Ástures
Capítulu VI: El medievu
Capítulu VII La Edá Moderna
Capítulu VIII: El sieglu XIX
Capítulu IX: El sieglu XX

Capítulu I:
¿Prehistoria d’Asturies?

Pintures rupestres, mariscu y dólmenes
.
Cuando pretendemos historiar un grupu humanu determináu, siempre nos atopamos col problema d’ú poner l’aniciu del mesmu: «Ónde tean los restos más antiguos nel territoriu pobláu anguaño por esi grupu humanu», suel ser la respuesta más común. ¿Pero hasta qué puntu ye asina? Dicho de otra mena, ¿la historia d’Asturies principia hai 300.000 años, cuando apaecen les primeres señes humanes? Si’l términu Asturies todavía nun taba creáu –y faltaríen munchos sieglos pa qu’asina fora– y polo tanto tampoco’l d’asturianu, esto ye, si esos seres d’hai 300.000 años nun se consideraben asturianos nin habitantes d’Asturies, ¿por qué deberíemos facelos nós?
Por desgracia, la tentación de retrotrayer los orixes históricos d’una comunidá hasta’l pasáu más remotu posible ye un viciu estendíu de manera universal na historiografía. Asina nos atopamos con obres sobre la historia d’España que falen d’Atapuerca (yacimientu de Burgos con restos d’hasta 1’5 millones d’años) como la cuna de los primeros españoles cuando la idea d’España y español, tal y como la entendemos anguaño, nun tien más de trescientos años. Siguiendo esti filu argumental, tolo qu’ocurrió a lo llargo de los sieglos no que güei ye’l Reino de España sería obra d’españoles: asina, Viriato foi un héroe español –datu qu’estudiamos d’esta forma munchos na escuela–, como l’emperador Trajano, Pelayo, el Cid Campeador, Isabel la Católica o Miguel Servet. Y el casu ye que nengún d’ellos considerábase español nel sentíu que-y damos anguaño.
Nós nun vamos a cometer esi error. Nestes llínees breves vamos intentar facer un esbozu de la historia asturiana, entendiendo por historia asturiana los acontecimientos y procesos acontecíos dende l’apaición d’un territoriu denomináu Asturies pobláu por unos habitantes nomaos asturianos. Sicasí, vamos a retrotrayenos entovía más y vamos repasar dalgunos datos sobre los primeros pobladores de lo qu’anguaño llamamos Asturies, esto ye, la Prehistoria, non d’Asturies, sinón n’Asturies. Procedamos.
Como dicíemos más arriba, los indicios primeros de presencia humana no que güei ye Asturies tienen unos 300.000 años y atribúyense al Homo Heidelbergensis, homínidu asentáu n’Europa hai ente 500.000 y 150.000 años. Nun son restos humanos propiamente, sinón restos de ferramientes, y atopáronse nel conceyu actual de Valdés. Les investigaciones arqueolóxiques dícennos qu’ente 125.000 y 75.000 años enantes de l’actualidá, grupos de cazadores y pañadores foron infiltrándose dende la costa hacia l’ interior d’Asturies siguiendo’l cursu los ríos.
Los restos humanos propiamente dichos más antiguos descubiertos hasta la fecha n’Asturies son los qu’apaecieron na cueva d’El Sidrón (Piloña) nel 1994, y pertenecen al Homo Neanderthalensis, con una antigüedá d’unos 100.000 años. En milenios posteriores, la presencia humana n’Asturies va quedar reducida al Homo Sapiens modernu, que mientres el Paleolíticu Superior va concentrase de manera fundamental nes fasteres centrales y orientales asturianes por mor de l’abundancia de cueves neses zones, que van ser el llugar fundamental d’ocupación poles glaciaciones que nesi momentu cubren Europa. Será nesta época cuando apaezan les ferramientes más ellaboraes y tamién les manifestaciones artístiques: nel territoriu asturianu actual hai 45 cueves con pintures y grabaos, dalgunes d’ellas, como Tito Bustillo, San Xuan de Priorio o La Peña, realmente espectaculares. Sobre esti tema ye necesario dar un datu: l’arte prehistóricu asturianu ta inmersu nun marcu cultural conocíu como franco-cantábricu, qu’abarcaría la Francia actual y la cornisa cantábrica de la Península Ibérica, mientres que l’arte prehistóricu del restu de la Península ta rellacionáu de forma direuta col mundu mediterraneu.
.
Sicasí, de tola Prehistoria asturiana, la etapa más llamativa, tanto por dase de manera esclusiva n’Asturies –y nuna una franxa costera portuguesa– como poles sos carauterístiques, ye’l periodu llamáu Asturiense, qu’abarcaría ente’l 7500 y el 5000 a.C. Nesta etapa namái detectábase actividá humana na metá oriental de la costa asturiana, y en forma de grupos que viven en cueves de la mariña que tienen como base de la so alimentación la recoyida de frutos marinos: crustáceos, moluscos, octópodos, etc. Dicho d’otra forma, la dieta d’estos grupos, mientres unos 2.500 años, compúsose nun 80 por cientu de mariscu, y prueba d’ello son los yacimientos con millones de conches de too tipu de crustáceos como llámpares, bígaros, amasueles, moxones, etc. ¿A qué se debió esti comportamientu? Nun ta mui nidio. Les ferramientes de los asturienses son de manera oxetiva menos variaes y de peor factura que les de la etapa cultural inmediatamente anterior, l’Aziliense. La especialización en mariscu, anque nun excluyía de manera plena otres fontes d’alimentación, tamién constitúi un emprobecimientu. Lo mesmo pue dicise de les manifestaciones artístiques. Nun ye incorreuto afirmar que l’Asturiense sía una involución cultural –lo que nun cuadra mui bien con esi mitu tan estendíu del progresu constante y indefiníu–, sicasí, nunos pocos sieglos produciráse un cambiu nuevu muncho más trescendental: la llegada al territoriu asturianu del Neolíticu, esto ye, l’agricultura y la ganadería.
La llegada a l’actual Asturies de les primeres tribus neolítiques, esto ye, agrícoles y ganaderes, nun se conoz con exautitú, pero se cree que nun ye anterior a unos 5000 años a.C. A esta xente debemos-y los restos llamaos megalitos, esto ye, construcciones de piedra grande xeneralmente de caráuter funerariu. Como pal tresporte del material y realización d’estos dólmenes y menhires monumentales fai falta un númberu de persones grande, podemos deducir que yá había una cierta organización social que diba más allá de la simple comunidá de cazadores y pañadores. Créese tamién qu’estos megalitos teníen una función añadida a la funeraria: la de servir de finxos o muñones enormes que marcaren les llendes del territoriu d’una u otra tribu.
Yá hacia’l 2500 a.C. entra lo que güei ye Asturies na Edá de los Metales, de manera  inicial el cobre, y prueba d’ello son les minas de cobre de L’Aramu, en Riosa, a 1.200 metros d’altor. Como se ve, la tradición minera asturiana nun principial col carbón precisamente. A lo llargo del mileniu siguiente, ente’l 1800 y el 800 a.C., sucederáse la Edá del Bronce, etapa marcada por una complexidá teunolóxica mayor, un aprovechamientu meyor del suelu pa l’actividá agrícola y ganadera, incluyida la deforestación pa ganar tierres de cultivu y de pastu, y una actividá militar incipiente, como muestren los restos d’armes d’esta época atopaos. A partir de la Edá del Fierro, habiendo yá testimonios escritos, podemos dicir que queda atrás la Prehistoria.

Capítulu II:
Los pueblos prerromanos

Castros, orfebres y metalúrxicos
.
De forma xeneral, conozse col nome de cultura castreña al modelu cultural que mientres la Edá del Fierro –dende’l 800 a.C. hasta la conquista romana en 19 a.C., de manera aproximada– s’estiende en llínees xenerales pel territoriu asturianu y lleonés actual. Toma’l so nome de los castros, poblaos fortificaos que constitúin la base del poblamientu –namái n’Asturies, y a falta d’un catálogu definitivu, hai llocalizaos más de 300–.
¿Quiénes construyeron esos castros? ¿Yeren los descendientes de los habitantes anteriores o unos nuevos? L’arqueoloxía –o más bien les escavaciones feches hasta la fecha– tovía nun nos pue dar respuestes definitives, pero en llínees xenerales paez almitío que mientres la Edá del Fierro delles foleaes de pueblos indoeuropeos procedentes de más allá de los Pirineos s’instalaren en bona parte de la Península Ibérica, incluyendo l’actual Asturies. Estos pueblos indoeuropeos seríen, al menos parte d’ellos, del troncu celta ¿Cómo lo sabemos? Por la teonimia –nomes de les divinidaes–, la toponimia –nome de los llugares– y l’antroponimia –nome de les persones–. Si un pueblu adora los dioses celtes, tien nomes de raigañu celta y vive en llugares denominaos con formes céltiques nidies, ta claro que dalgo de celta ha de tener. Bien ye verdá que d’esti términu abusóse muncho y lo mesmo qu’hubo y hai quién s’empeña en negar la menor presencia celta en territoriu asturianu, tamién los hai que ven celtes per tolos llaos. Los datos escritos tampoco dan una respuesta definitiva: los escritores romanos, a la hora de describir a los pueblos del noroeste peninsular, nun falen de celtes. Sicasí, restos culturales célticos hai. ¿Qué yeren, entós, los habitantes de los castros?
Lo más lóxico ye pensar que, a lo llargo de dellos sieglos, foleaes migratories indoeuropees diferentes, incluyendo pueblos del troncu celta, s’instalaron nel noroeste peninsular. Ellí amestáronse cola población preesistente, esto ye, los constructores de los megalitos, conformándose un espaciu étnicu nuevu, híbridu de cultura indoeuropea y preindoeuropea. Los pueblos instalaos alredor del ríu Ástura –anguaño Esla, afluente del Duero, pero posiblemente tamién el Seya, yá que dambos nacen a mui poca distancia ún del otru y na mesma cadena montañosa, anque discurren en sentíu opuestu, ún en direición norte y otru en direición sur– pasaron a ser conocíos col nome d’ástures, y asina siguieron siendo denominaos polos romanos cuando contautaron con ellos nel sieglo I a.C.; éstos estendieron la denominación a tolos habitantes del conventu o xunidá alministrativa na que taben incluyíos. Esi conventu foi conocíu tamién como Asturia, y a partir de la Edá Media, como Asturias y Asturies, en plural, pero yá pa referise al territoriu asturiano actual y a bona parte de l’actual Cantabria. Tamién va ser na Edá Media cuando se dexa d’usar el términu ástures y apaez el d’asturianos. Podemos dicir,  como fai José Manuel González, y ensin cayer nel esencialismu, qu’Asturies nunca tuvo más nome que ésti, yá qu’enantes de ser nomada asina nun foi llamada de nengún mou.
.
L’aspeutu que podía presentar el país de los ástures na Edá del Fierro yera’l d’un territoriu pobláu d’un estremu a otru, onde los sos habitantes –calcúlense unes 100.000 persones pa l’actual Asturies– realizaben actividaes propies d’un estadiu cultural relativamente avanzáu, con una economía basada nuna agricultura más bien precaria, la ganadería y la pesca, con una actividá minera continuadora de la d’etapes anteriores, una actividá metalúrxica intensa –en casi tolos castros escavaos apaecen restos de fundiciones, y los habitantes de Noega, la más remota antepasada de Xixón, sita en La Campa Torres, eran los cilúrnigos, que significa caldereros– basada na fabricación d’armes, ferramientes y oxetos diversos, y una mui notable orfebrería, como muestren obres como el collar de Llangréu y, de manera mui espacial, la diadema de Moñes (Piloña). Los ástures, o polo menos determinaes tribus, prauticaben el comerciu a llarga distancia, como prueba’l yacimientu de La Campa Torres. Yera un pueblu guerreru, con divisiones sociales mínimes, que prauticaba la comunidá de bienes y que paecía tener una conciencia coleutiva ástur nidia, como fai indicar el so comportamientu mientres les guerres colos romanos.
El datu mentáu anteriormente de la orfebrería ye importante: los ástures trabayaben l’oru porque lu estrayíen de los sos propios yacimientos, situaos fundamentalmente nel occidente asturianu. Ésa va ser una de las razones fundamentales de la invasión romana: facese colos recursos mineros d’Asturia, anque pa ello tuvieran que recurrir a una escusa distinta, que yera la hostilidá de los ástures pa con otros pueblos de la meseta yá sometíos a los romanos, como los autrigones y los vacceos. Roma, defensora eterna de la paz y la llibertá, veríase obligada a intervenir pa defender a los sos aliaos y, yá puestos, procedería a conquistar, someter y esplotar el territoriu de los ástures, eso sí, pol propiu bien de los vencíos. Como podemos ver, les escuses pa les guerres de conquista camudaron bien poco nos 2.000 años últimos.
PUEBLOS ASTURES
(Pasar el cursor percima del mapa pa ver les zones)

Capítulu III:
Ástures y romanos

Mines, soldaos y villes
.
Les guerras que protagonizaron los romanos contra ástures y cántabros ente’l 29 y 19 a.C. acabaron cola victoria de los primeros. Tuvieron delles fases: nuna inicial los ástures optaron pola guerra convencional –al contrario de los cántabros, que dende’l principiu adoptaron la táutica guerrillera–, xuntando un gran exércitu y enfrentándose a los romanos nuna batalla importante –Lancia, a orillas del río Ástura, y en un llugar entovía por concretar de Lleón–, na la que foron derrotaos y formalmente sometíos. Poco depués, cuando tornaron a sublevase, adoptaron la táutica guerrillera de los sos vecinos. El fechu de que los ástures, de manera inicial, optaren por llevantar un gran exércitu y entamar una guerra convencional indica que yera un pueblu con un nivel d’organización social y una identidá coleutiva relativamente avanzada, como tamién lo muestra’l yacimientu de La Carisa (Ḷḷena; toma’l so nome de Publio Carisio, el xeneral romanu que dirixó les operaciones contra los ástures), onde frente a un campamentu romanu atopamos una fortificación ástur de dellos centenares de metros que tenía como oxetivu cortar el pasu a los invasores y que, pol so tamañu, requirió una abundancia grande de mano d’obra, lo qu’indicaría una organización del trabayu y una coordinación mui perriba de la que podríen tener un grupu de tribus coxunturalmente aliaes.
Pero nin la guerra convencional nin la guerrilla pudieron frenar la maquinaria militar romana y, a partir de 19 a.C., la invasión y sumisión del norte peninsular yá taba consumada, anque les rebeliones esporádiques van estendese dalgunos años más. Eliminada la resistencia, l’imperiu romanu procedió a esplotar la tierra de los ástures nel so beneficiu propiu. En primer llugar, organizaron el territoriu: los ástures, tanto cismontanos –los que tán al sur de la cordillera– como tramontanos –los que tán al norte– foron englobaos nel conventus asturum, unidá alministrativa inicialmente integrada na provincia tarraconense y posteriormente en Gallaecia, qu’abarcaba l’actual Galicia, norte de Portugal (hasta’l Duero), Asturies, Lleón, Zamora, Cantabria, Palencia y parte de les provincies actuales coles que llenden. La capital del conventu y, polo tanto, de los ástures, foi una población creada con esi fin, Asturic a Augusta, l’actual Estorga.
Dellos foron los factores de romanización d’Asturia. En primer llugar, la minería. Mientres más de doscientos años los romanos esplotaron les mines d’oru del occidente asturianu, estrayendo nesi periodu unos 250.000 quilos. Les mines yeren propiedá imperial, pero taben esplotaes por particulares qu’emplegaben mano d’obra esclava. pero tamién asalariada, yá que’l trabayu nes mines yera una vía de promoción social –los mineros, depués de dellos años de serviciu, podíen llograr la ciudadanía llatina, que nun yera lo mesmo que la romana, pero otorgaba una serie de derechos–. Les mines zarraron nel sieglu III d.C. porque dexaron de ser rentables.
.
Otru factor de romanización yera l’exércitu: anque’l territoriu asturianu actual nun foi sede permanente de nenguna lexón, sí lo foi de dalgunos destacamentos que  s’encargaben de vixilar les víes de comunicación y les mines. L’exército yera, al igual que la mina, una vía de promoción social: numberosos ástures canalizaron el so ardor guerreru allistándose nes lexones romanes, yá que si sobrevivíen a los años de serviciu y llograben la honesta missio (llicenciatura con honores) yeren recompensaos cola ciudadanía y un cachu de tierra, yá fora na propia Asturia o, como yera más común, n’otres partes del imperiu, colo que se convertíen n’axentes de romanización d’otros pueblos sometíos. Hai dellos exemplos documentaos d’esta presencia ástur nel exércitu romanu, pero los más famosos son los de Pintayo, natural de Intercatia, llugar indetermináu d’Asturia, que llegó a ser signifer o portaestandarte, morriendo a los 30 años en Xermania, siendo-y dedicada una llábana polos sos compañeros que se conserva en Bonn (Alemaña); y tamién el de Gayo Sulpicio Úrsulo, natural de Uxo (Mieres), que depués de servir como oficial mientres dellos años retiróse al so pueblu de nacencia, u se convirtió nun notable llocal.
El tercer elementu romanizador son les ciudaes, que si bien nun alcanzarán n’Asturia nin de cerca’l tamañu y esplendor de les de la costa mediterránea, son un focu importante de tresmisión de la llingua, lleis y costumes romanes. Na actual Asturies hubo tres civitates: Gigia (Xixón), Lucus Asturum (Llugo de Llanera) y Flavionavia (posiblemente cerca de Pravia).
Un cuartu factor de romanización seríen les víes de comunicación, qu’articulaben el territoriu y permitíen el control político-alministrativu del país, asina como la esplotación de los recursos. La vía principal coneutaba Gigia con Asturica Augusta, pero tamién había otres que coneutaben oriente y occidente.
Otru elementu más son les villae romanes, esplotaciones agrícoles de ciertu tamañu que cobren especial relevancia a partir del sieglo II d.C., cuando la crisis económica del imperiu y la decadencia de les ciudaes obliga a adoptar formes económiques nueves. Les villes instaláronse sobre manera na mariña y nes vegues del interior, y a veces se reconoz el so emplazamientu polos topónimos actuales finaos en ‘-ana’, asociaos al nome del so propietariu: ye’l casu de Mamorana (de Mamorio) y Villayana (Villa Iuliana), dambas en Ḷḷena; o Corneyana (de Cornelio), en Grau. Otres villes importantes foron Veranes (en Xixón, la más grande), Pueyes, Tremañes o Pumarín.
Un últimu factor sería l’idioma, el llatín, inicialmente faláu únicamente polos funcionarios, propietarios y militares romanos, pero qu’asumiríen de manera progresiva les élites llocales y tolos indíxenes más en contauto cola romanización, como mineros, soldaos y habitantes de les ciudades y villes, o na so redolada. Esi llatín popular, cada vegada más distintu del clásicu, propiu de la élite, va dir incorporando xiros, rasgos fonéticos y entovía léxicu indíxena pa dar llugar, sieglos depués, a la llingua asturiana.
Toos estos elementos contribuyeron, con intensidá variable, a romanizar a los ástures, procesu seguramente llargu nel tiempu dao’l caráuter ultraperiféricu del país de los ástures nel imperiu romanu, pero irreversible. Anque haya quién prefiera resaltar los rasgos prerromanos como elementu fundamental de la identidá asturiana actual, nun podemos escaecer que la organización del espaciu, la relixón cristiana, el Derechu y la llingua asturiana vinieron de la mano de los romanos, polo qu’Asturies forma parte de la Romania atlántica, esto ye, un país de llingua y cultura llatines, pero non mediterránees.

Capítulu IV:
De los sieglos escuros a la invasión islámica

Cristianismu, godos y seniores
El periodu comprendíu ente los sieglos V y VIII recibe na historia asturiana’l nome de sieglos escuros por mor de la poca documentación de la que se dispón pa conocelu. Poques, poquísimes fontes escrites y poques fontes arqueolóxiques, munches d’elles tovía por escavar, son les escases ferramientes disponibles pa reconstruyir esta época.
.
Nel añu 476 dexaba d’esistir de manera formal l’imperiu romanu d’occidente, anque n’Asturia y nel restu de Hispania’l poder de Roma yá hacía años que fora sustituyíu pol de los pueblos xermánicos llegaos décades atrás. Esos pueblos yeren los suevos, vándalos, alanos y visigodos. Los primeros instaláronse na parte más occidental de la Gallaecia, estableciendo un reinu que con toda seguridá incluyía la parte occidental d’Asturia, la poblada polos pésicos, ún de los pueblos ástures. Vándalos y alanos emigraron a África o foron esterminaos polos visigodos, qu’acabaron dominando la mayor parte de la península depués de ser espulsados de la Galia polos francos. Mientres los sieglos V y VI sucédense les disputes ente estos pueblos polos restos del imperiu y por controlar a les poblaciones indíxenes romanizaes que, n’ocasiones, aprovechen l’ausencia d’un poder central fuerte pa recuperar la independencia.
N’Asturia, la inestabilidá política y la inseguridá demuéstrense pola reocupación temporal de los castros que llevaben abandonaos cientos d’años. Esto ye, énte’l temor a ataques, la población torna a xubir dende los valles desprotexíos a los montes y llombes u s’alcontraben los antiguos poblaos fortificaos, de más fácil defensa. Per otru llau, la inseguridá favorez la vinculación de los llabradores a los seniores, los propietarios rurales asturromanos con poder económicu suficiente como pa convertise en xefes llocales venceyaos al poder suevu o visigodu por débiles llazos de fidelidá.
L’ambigüedá de los datos sobre’l nivel d’efectividá de la ocupación xermánica son poques pero suficientes pa danos una idea aproximada. Asina, nel parroquial suevu del 569 inclúise Pésicos como una de les parroquies de la sede episcopal d’Estorga, lo qu’indicaría’l dominiu suevu sobre l’occidente ástur. El rei suevu Miro dirixó trés años depués una campaña contra los roccones, xeneralmente identificaos como los luggones, esto ye, los ástures de la zona central y oriental d’Asturia. Nel 585, el reinu suevu desapaecía conquistáu polos visigodos. Nel 612, el rei visigodu Sisebuto apaez como vencedor de los mesmos roccones contra los que lluchares los suevos. Los datos posteriores permiten afirmar que, con mayor o menor intensidá, los ástures van quedar definitivamente baxo dominiu visigodu hasta l’esbarrumbamientu del reinu cien años depués. Pese a ello, a lo llargo del sieglu VII les cróniques recueyen noticies de sublevaciones nueves de los ástures, asina como de cántabros y vascones. Precisamente contra estos últimos taba en campaña el rei Roderico (Rodrigo) cuando se produz la invasión islámica, nel 711.
Por último, hai que señalar nestos sieglos otru cambiu fundamental ente los ástures: la so cristianización. Nun podemos saber con exautitú cuándo s’anició nin cuánta foi la so intensidá, pero paez confirmao que dende’l sieglu III atopamos cristianos nel conventu ástur, si bien en Legio (Lleón) y Astúrica (Estorga), y non al norte de la cordillera. Los primeros datos de comunidaes cristianes na actual Asturies seríen de finales del sieglo III o principios del IV. Nos sieglos siguientes, convertiú yá’l cristianismu na relixión oficial del imperiu y asumíu dafechu poles élites romanes, dirá estendiéndose ente la población, anque les práutiques paganes, bien en solitariu o amestaes col cristianismu –al estilu de las relixones afrocaribeñes, mezcles sincrétiques de catolicismu y politeísmu africanu–, pervivirán mientres sieglos. Los nuevos dominadores xermánicos non fixeron sinón reforzar el caráuter oficial del cristianismu, yá fora na so vertiente arriana o na católica romana. Too paez indicar que cuando s’anicia’l reinu ástur nel sieglu VIII, el cristianismu ye hexemónicu dafechu, anque les cróniques falen de represión del paganismu n’épocas tan tardíes como la del rei Ramiro (842-850).

Capítulu V:
El Reinu de los Ástures

Guerres, princeps y prerrománicu
.
Pocos elementos hai na historia asturiana onde s’amiesten con más intensidá’l mitu y la realidá. Les fontes documentales son muncho más abundantes que n’époques anteriores, pero la so oxetividá ye en munchos casos más que duldosa. En too casu, tán más allá de toda dulda una serie de datos: nel 711 invade Hispania un exércitu formáu por árabes y bereberes de relixón islámica. La so intención inicial yera participar na guerra civil que nel reinu visigodu manteníen los partidarios de Roderico y de Witiza a favor d’ésti últimu, pero la facilidá cola que derrotaron al primeru na batalla de Guadalete y el posterior esbarrumbamientu del estáu visigodu fixeron que los musulmanes decidieran realizar una conquista completa y dominiu d’Hispania.
Nun-yos costó muncho. En munchos casos nun fixo falta la conquista violenta, yá que mediante’l pautu coles élites llocales, hispanorromanes o xermániques, a les que se-yos respetaba la so situación a cambio d’aceptar a los dominadores nuevos, en mui pocos años consiguieron facese col control de tola península. ¿Toda? Sí, toda. Incluyendo Asturies.
Los árabe-bereberes tamién ocuparon el territoriu de los ástures, estableciéndose en Xixón, con gobernador incluyíu, y posiblemente establecieron dalgunos puestos de vixilancia nos puntos clave. Pero esta situación nun duró muncho: el sistema socieconómicu impuestu polos conquistadores nuevos, basáu na tributación, nun debió de gustar a unos ástures en procesu de feudalización y poco dependientes d’una autoridá central a la que pagar impuestos. Eso, sumao a la posible aversión relixosa y a un reconocíu amor pola llibertá foi’l detonante d’una sublevación dirixida por Pelagius (Pelayo), escoyíu n’asamblea polos xefes ástures. ¿Quién yera Pelayo? Anque les cróniques nos dicen que yera godu, nun ye ésti un dato demasiao fiable, yá que diches cróniques escribiéronse casi doscientos años depués de los fechos, na época d’Alfonso III, cuando’l reinu ástur pretendía presentase como socesor del reinu visigodu por razones de prestixu esterior, anque nun tuviera nada que ver col mesmo –al igual que poles mesmes feches l’imperiu carolinxo pretendía facese pasar por continuador del imperiu romanu ensin selo–. Per otru lláu, resulta bastante estraño que, siendo godu, tuviese un nome grecollatín, y que depués de que s’esbarrumbara con tanta facilidá el reinu visigodu, foran los ástures, pueblo escasamente sometíu a aquellos, a escoyer como xefe de la rebelión a un estranxeru derrotáu recién. Anque sólo podemos especular, dada l’ausencia de datos definitivos, nun sería estraño suponer que pudiera ser un xefe indíxena, asturrromano, venceyáu a la elite xermánica y que, énte l’esbarrumbu del reinu godu, optase por tornar al so país, el de los ástures, y que, fartu del dominio islámicu –por relixón, por nun pagar impuestos, por espíritu d’independencia o por too ello xunto– decidiese llanzase a la rebelión depués d’algamar el sofitu de la elite ástur.
.
Ente’l 718 y el 722, yá que nun sabemos la fecha exauta, prodúxose la guerra de lliberación que tien el so momentu principal na batalla de Cuadonga. Pa les cróniques cristianes de la época d’Alfonso III foi una batalla grandiosa na que, milagru mediante, aniquiláronse más de 180.000 invasores, cifra ridícula dafechu –nun habría en tola península esa cantidá d’árabes y bereberes, y muncho menos soldaos, y evidentemente nun diben a metelos a toos nel monte Auseva–. Pa les cróniques musulmanes, un pollín xabaz nomáu Pelayo –asina lo ponen– sublevóse, foi atacáu hasta que’l so exércitu quedó reducíu a una trentena d’homes y muyeres y, al dexar de ser una amenaza, foi abandonáu en Cuadonga.
De forma lóxica, nenguna de las dos versiones ye verídica. La cristiana, por esaxerada; la musulmana, por minimizar lo evidente. Si la victoria fora de los musulmanes, nun s’esplica por qué nos años siguientes apaez el reinu de los ástures, pequeñu pero emancipáu de los invasores. Too paez indicar que la victoria ástur sirvió pa lliberar bona parte de l’actual Asturies de la tutela islámica y que Pelayo, escoyíu princeps –xefe, líder, pero non rei– estableció un pequeñu reinu con capital en Cangues que los sos socesores s’encargaríen d’ampliar, de manera inicial a toles tierras ástures y, posteriormente, a otros pueblos y territorios.
Trece foron los monarques ástures al norte de la cordillera: Pelayo (718-737), Favila (737-739), Alfonso I (739-757), Fruela I (757-768), Aurelio (768-774), Silo (774-783), Mauregato (783-789), Vermudo I (789-791), Alfonso II (791-842), Nepociano (842), Ramiro I (842-850), Ordoño I (850-866) y Alfonso III (866-910).
El reino de los ástures, qu’asina s’autodenominó, fai referencia a una concepción étnica, non territorial. Los socesores de Pelayo van caltener mientres tol sieglo VIII, y bona parte del IX, esta concepción, inclusive cuando’l reinu abarca a otros pueblos, como los vascos o los galaicos. De fechu, les cróniques asturianes utilicen el términu Spania precisamente pa designar aquello que nun ye’l reino de los ástures, esto ye, el territoriu baxo control islámicu. Los ástures van organizase nun estáu feudal, anque falar d’estáu nesta época d’ inicios de la feudalización implica estrapolar conceptos, yá que la idea d’estáu que tenemos anguaño difícilmente correspuende cola d’esta época, onde’l reino ye una agregación de nobles xuníos ente sí por llazos de parentesco y/o fidelidá que tienen al monarca como un primus inter pares. A midida que los sistemes d’alliances ente les élites van camudando, alquiriendo más pesu los d’una zona u otra del Reino Ástur, va camudando la sede regia: asina, si con Pelayo y los sos socesores la capital será Canques d’Onís, con Silo (774-783) treslládase a Pravia, pa pasar a Uviéu con Alfonso II (791-842) y a Lleón con García I (910-914). Esa feudalización, esto ye, la cayida de los llabradores en situaciones de cada vegada mayor dependencia respeuto a la nobleza, va ser causa de rebeliones sociales como l’asocedida en tiempos d’Aurelio (768-774). Per otru lláu, van ser constantes los enfrentamientos ente diferentes facciones de la nobleza, como les que van enfrentse a la nobleza ástur y galaica en tiempos de Fruela I, Silo y Ramiro I. Por último, tán les guerres esteriores contra los musulmanes, más o menos frecuentes mientres estos doscientos años, y los ataques vikingos, documentados en tiempos de Ramiro I y Ordoño I.
Con dificultaes grandes, el Reinu Ástur acaba consolidándose, llegando a alcanzar un ciertu poder y estableciendo aliances na época de Alfonso II cola gran potencia del momentu, el Reinu Franco de Carlomagno. El términu Asturies comienza a apaecer nos documentos yá con un significáu territorial y amás mui asemeyáu al actual. Dende’l sieglo IX yá tenemos Asturies y asturianos.
.
Nun podemos acabar esti capítulu ensin facer mención de la obra constructiva de la monarquía ástur, que foi quien a crear un estilu constructivu orixinal y único que los historiadores del arte denominen prerrománicu. La mayoría d’estes construcciones realizáronse na sede real, Uviéu, en tiempos d’Alfonso II y Ramiro I, y casi toles que se conserven son de caráuter relixoso –ilesies de San Miguel de Lliñu, San Pedro de Nora, Santianes de Pravia, Santa Cristina de Ḷḷena, Santuyano d’Uviéu y San Salvador de Valdediós– anque tamién perviven el Palaciu del Naranco –mucho depués reconvertíu na ilesia de Santa María– y la fonte de Foncalada que ye, por cierto, la única obra civil d’utilidá pública que se conserva d’esta época n’Europa occidental (finales del sieglu VIII).
Un apunte últimu: en tiempos d’Alfonso II descúbrese el sepulcru del apóstol Santiago, ocasión dorada pa la monarquía ástur pa emancipase de la tutela de la Ilesia católica toledana –asitiada en territoriu islámicu– al suponer un plus de prestixu añadíu pa la única monarquía cristiana d’Hispania la posesión de la tumba presunta d’ún de los discípulos de Cristu. Nos sieglos vinientes, la peregrinación a dicha tumba va acabar articulando una vía de comunicación y comerciu de primer orde: el camín de Santiago, que va percorrer tola Europa católica.

Capítulu VI:
El medievu

Marxinalidá, poles y rebeliones
.
El treslláu de la capital del Reino Ástur a Lleón non sólo implica cambia-y el nome al reinu surdíu de la rebelión antiislámica, sinón tamién la marxinación progresiva de la nobleza asturiana del centru de poder frente a la nobleza desplazada a la capital nueva, que va dir ampliando los sos dominios a midida que’l reinu avance hacia’l sur. Asina, Asturies repliégase sobre sí mesma, entrando nuna progresiva fase d’aislamientu que va durar sieglos y que la dexa fuera de los grandes acontecimientos históricos del medievu hispánicu.
Pese a ello, la vinculación d’Asturies col camín de Santiago permitió al nuesu país una rellación intensa con Europa occidental al traviés de los pelegrinos y comerciantes d’esa procedencia –que yeren denominaos de manera xenérica francos– que pasaben pela nuesa tierra, trayendo productos o quedándose a vivir equí. Per otru llau, el comerciu marítimu d’Avilés col arcu atlánticu –Francia y isles britániques– favoreció’l desarrollu d’esta villa costera. Uviéu quedó como sede episcopal y la Ilesia convirtióse nún de los poderes principales del país a falta d’una autoridá política fuerte qu’exerciera un contrapesu.
Esa marxinalidá respeuto a la corona lleonesa, y castellana después, asina como’l desarrollu económicu relativu qu’esperimenta Asturies nel sieglo XII, común al del restu de la Europa feudal, ye lo que fai qu’un sector de la nobleza asturiana s’anime a ensayar proyeutos independentistes contra la corona castellana. Asina, a mediaos del sieglu XII prodúcense les rebeliones de Gonzalo Peláez contra’l rei Alfonso VII, y años depués, la d’Urraca, fía del mesmu Alfonso VII con una dama asturiana.
Nestos sieglos, Asturies ta inserta dafechu na economía y sociedá feudales. Ilesia y nobleza son los grandes propietarios de la tierra, y los llabradores, vasallos de los anteriores, trabayen pa los sos señores nuna agricultura –centenu, escanda, berces, nabos, fabes, cebolles…– y ganadería –oveyes, cabres, caballos, vaques, pites y el rei de la casa, el gochu– de sobrevivencia, teniendo qu’entregar la mayor parte del escedente a los propietarios de la tierra.
Pa favorecer el comerciu y el desarrollu urbanu, del  sieglu XII al XIV los monarques castellanos y/o lleoneses van dir otorgando a dellos conceyos asturianos cartes-poles o fueros pa la creación de poles o villes nes que constituyir un mercáu semanal y asina favorecer l’intercambiu. Eses poles son l’orixe de les villes asturianes de tal nome (Pola de Llaviana, de Ḷḷena, de Somiedu, de Siero y Puela d’Ayande) y d’otres que nun lu conservaron pero que reciben nesta época una carta-pola: Xixón, Gozón, Nava, Llanes, Cangas, etc. N’ocasiones les poles son de creación nueva, como Castripol o Villaviciosa, mientres que n’otros casos concédense los privilexos a poblaciones yá esistentes, como Xixón o Pravia. Los habitantes de les poles yeren declaraos llibres, esto ye, non suxetos al señor feudal, y teníen una serie de derechos civiles reconocíos, polo que la creación de les mesmes siempre contó cola oposición de los señores feudales, tanto laicos como eclesiásticos. Dalgunes d’estas poblaciones acabaron convirtiéndose en villes importantes (Xixón, La Pola Siero, Tinéu, Cangas, etc.), mientres qu’otres nun llograron fructificar y siguieron siendo pueblos pequeños (La Pola d’Ayer, agora La Pola’l Pinu, o Les Regueres).
.
Mientres estos sieglos va producise un procesu de trescendencia especial pa la cultura asturiana: el surdimientu del asturianu como una llingua escrita. El vieyu llatín de la época imperial evolucionara tanto y de forma tan distinta nos diferentes territorios que formaren parte del imperiu que nel sieglu XII l’idioma usáu nos documentos oficiales yera inintelixible pa la gran masa de la población analfabeta, que falaba un llatín muncho más evolucionáu y amestáu coles llingües precedentes y con aquelles coles que taben en contauto. Anque les sos diferencies naquella época yeren menores qu’agora, van surdiendo de forma nidia idiomes como l’asturianu, el castellanu, el gallego-portugués, el catalán, el lombardu, l’occitanu, el toscanu, el francés, etc. Nesti sieglu principia la escritura en llingua vulgar nos documentos oficiales, esto ye, la llingua del pueblu, y con ello apaez l’asturianu como una llingua escrita. El documentu más antiguu del que tenemos constancia ye’l Fueru d’Avilés, del 1155, pero nos años siguientes dirán apaeciendo munchos más, yá que, anque anguaño resulte estraño, ente los sieglos XII y XIV les llingües oficiales d’Asturies, aquelles usaes na Alministración, la ilesia y nos documentos oficiales, llaicos o relixosos, van ser l’asturianu y el llatín. La imposición del castellanu va llegar a finales del sieglu XIV coincidiendo cola sumisión de la élite asturiana a la corona castellana al traviés de la creación del ‘Principado’.
Nel sieglu XIV, Asturies vese afeutada, como toda Europa occidental, pola decadencia xeneralizada de la sociedá feudal, causa y efeutu de guerres, crisis económiques y axitaciones sociales. Disminúi’l comerciu, lleguen años de colleches males, la nobleza intenta apretar tovía más a los llabradores y a la propia corona, de la qu’esixen más privilexos, y esto xenera tensiones sociales grandes que se ven na figura de nobles-bandoleros como Gonzalo Peláez de Coalla, de principios del sieglu XIV, o en conflictos como’l de los perxuraos de Llanera a principios del XV, que foron escomulgaos pol arzobispu d’Uviéu al negase a pagar impuestos nuevos. La falta de perres, y polo tanto de donaciones, vese na lentitú de la construcción de la catedral d’Uviéu, aniciada a finales del sieglo XIII y acabada a principios del sieglu XVI, y entovía con una sola torre y non con dos, como taba diseñada.
El contestu de crisis económica y d’enfrentamientos ente nobleza, corona, villes urbanes y llabradores desencadena, a finales del sieglu XIV, la rebelión del conde Alfonso Enríquez, principal señor feudal d’Asturies, que se fadrá fuerte en Xixón frente al exércitu castellanu. Episodiu ésti mui poco conocíu, l’asediu de Xixón tien tolos ingredientes d’una película de Hollywood: una ciudá defendida por una princesa portuguesa, Isabel de Bragança, esposa d’Alfonso Enríquez, y apoyada por una flota de pirates ingleses a cambio d’usar el puertu como base d’operaciones pa les sos aiciones de piratería pela costa gallega; una ciudá que namái se podía asaltar unes horas al día, yá que, cuando xubía la marea, quedaba convertida nuna isla; un pautu de rendición pol qu’Isabel y los sos partidarios parten per mar hacia Bretaña… Derrotáu y exiliáu Alfonso Enríquez, el rei Juan I decide venceyar de manera direuta a Asturies cola corona castellana, convirtiéndola en feudu del monarca, y entregándolu en calidá de principáu al herederu de dicha corona, como una forma de tener bien suxeta al poder central a la rebelde nobleza asturiana.

Capítulu VII:
La Edá Moderna

Fidalgos, coritos y maíz
.
El periodu comprendíu ente los sieglos XVI y XVIII, dambos incluyíos, constitúi otra edá escura na historia asturiana, nesti casu non porque falte documentación pa reconstruyila, sinón porque nesti tiempu nun ocurren n’Asturies nin grandes convulsiones polítiques, sociales o militares d’eses qu’enllenen los llibros de Historia. Convertíu nun territoriu marxinal y ultraperiférico del Imperiu de los Austrias primero, y de los Borbones, depués; perdíu’l protagonismu políticu del que gozara na Alta Edá Media, Asturies dedícase a apigazar mientres esti peroodu, tamién conocíu como l’Antiguu Réxime, y a esportar trabayadores y soldaos a mayor gloria de los monarques castellanos primero, y españoles, depués. Sicasí, eso nun quier dicir que n’Asturies nun pase nada; por supuesto que pasen cosas, y vamos ver  dalgunes.
Mientres too esti tiempo, Asturies goza d’una institución d’autogobierno, la Xunta Xeneral del Principáu, de la que fecha concreta de creación nun conocemos, pero que se remonta como mínimo hasta’l 1444. Esta Xunta funcionaba como una especie de parllamentu foral d’unos 40 miembros que se reunía cada tres años, nomando nos periodos intermedios una Diputación Xeneral que funcionaba como un gobiernu autónomu presidíu por un Procurador Xeneral. Ttaba formada polos representantes de los conceyos asturianos, anque esa representación solía tar monopolizada poles families más importantes de cada zona. Nun tenía atribuciones llexislativas, pero sí una capacidá fiscal y de xestión importante. Como Asturies nun taba representada nes cortes castellanes, la Xunta Xeneral funcionaba como’l muérganu intermediariu ente la Corona y el Principáu, yá fora pa recaudar impuestos o para reclutar soldaos pa less guerres constantes que la monarquía va realizar n’Europa.
Mientres tanto, la situación económica yera más que difícil. La población crecía, pero l’agricultura nun producía suficiente p’abastecer a tola población. Una mala collecha d’escanda yera una calamidá; dos siguíes, una catástrofe. Eso foi lo que pasó nos periodos 1572-76 y 1597-99, provocando momentos de fame que tuvieron como consecuencia una reducción drástica de la población pola propia fame y la peste –la propia Xunta Xeneral llegó a falar d’una disminución de dos tercios, y anque la cifra paez esaxerada, val pa facese una idea de la magnitú del desastre–. El comerciu yera mui escasu y fundamentalmente marítimu, col arcu atlánticu, yá que les comunicaciones por tierra con Castilla yeren muncho más difíciles, por nun dicir imposibles mientres dellos meses al añu. La introducción del cultivu del maíz n’Asturies a partir del sieglu XVII fixo qu’esti cereal pasara a ser parte fundamental de la dieta y permitió una meyora sustancial na alimentación de la población que se traduxo nun aumentu demográficu notable.
Nestes condiciones nun ye estraño que los asturianos emigrasen. Les élites a la corte, primero en Valladolid y llueu en Madrid, a facese un llugar baxo’l sol de la monarquía en forma d’altos cargos de l’Alministración civil, militar o eclesiástica. Los probes, tamién a Madrid, a trabayar nos oficios más humildes, sobre manera d’aguadores. Como suel asoceder con tolos inmigrantes, de forma especial colos qu’ocupen la posición social más baxa, foron víctimes de burlles y despreciu por parte de los castellanos, que los llamaben coritos, bien poles sos ropes de cueru o pola so presunta falta de cogorote. Los grandes escritores castellanos del sieglo d’Oru, como Cervantes, Quevedo o Lope de Vega, carauterizáronse pol so despreciu a los asturianos y asina lo reflexaron nes sos obres. Ente esos asturianos emigraos a la Corte atopamos pintores (Juan Carreño Miranda), militares (Pedro Menéndez d’Avilés), políticos (Melchor Gaspar de Xovellanos o Pedro Rodríguez de Campumanes) o eclesiásticos (Fernando de Valdés Salas). Munchos d’ellos aprovecharán la so influencia pa impulsar midíes favoratibles pa la so tierra, inaugurando asina la imaxe del asturianu en Madrid qu’aspira a exercer d’algamador pa la so tierra en llugar d’intentar qu’ésta s’autogobierne. Por exemplu, Valdés Salas, que llegó a ser inquisidor xeneral del imperiu de Felipe II, dexa a la so muerte (1568) parte de la so inmensa fortuna pa crear una Universidá n’Uviéu que sería realidá nel 1608. Dada la situación de marxinalidá política, cultural y económica que padecía Asturies nesa época, namái la xenerosa donación del asturianu fixo posible que’l nuesu país dispusiera d’una universidá en fecha tan temprana. Otru de los grandes asturianos en Madrid será Xovellanos, renuevu de la nobleza de Xixón, ministru de Carlos IV y al que se-y deben numberoses reformes na época de la Ilustración, asina como munchos proyeutos que nun llegaron a facese, como’l de la primer academia de la llingua asturiana, diseñada a imitación de la RAE y que de llegar a facese nel so momentu sería la segunda n’antigüedad de tol reinu.
.
Un datu últimu a destacar d’esta etapa ye’l caráuter peculiar qu’adopta n’Asturies l’Antiguu Réxime, esto ye, la sobrevivencia de la división feudal en trés bloques o estamentos: nobleza, cleru y tercer estáu, caún d’ellos diferenciado llegalmente y con distintos derechos y deberes, y común a toda Europa. Los dos primeros grupos yeren los dominantes y basaba nos sos privilexos xurídicos –como’l de nun pagar impuestos direutos– su preeminencia. Pero la división n’estamentos nun evitaba la división de clases, yá que’l tercer estáu taba formáu por un aglomeráu formáu polos llabradores –propietarios o non–, la burguesía rural y urbana, o los artesanos. En xeneral, la nobleza pertenecía a la clase dominante porque yera, xunto a la Ilesia, la gran propietaria de la tierra, la principal fonte de riqueza nesta época. Pero non tola nobleza yera igual de propietaria y, polo tanto, igual de rica, y l’escalafón más baxo de la nobleza, los fidalgos, encontrábase n’ocasiones nuna situación económica más que difícil. En Castilla, onde la nobleza nun llegaba al 5 por cientu de la población, ser fidalgu yera un privilexu que mui pocos poseyíen, y yera considerao deshonroso que quien disfrutara d’esa condición se dedicase a otra cosa que nun fora vivir de les rentes o la milicia. Esto ye, tenía prohibío trabayar. Sicasí, n’Asturies, y tamién en Bizkaia, diose la situación curiosa de qu’una gran parte de la población –la inmensa mayoría a mediaos del sieglu XVIII– tenía la condición de fidalga y, a pesar d’ello, siguía trabayando de llabradores, ganaderos, criaos o artesanos –lóxico, porque de dalgo había que vivir–, cosa que provocaba plasmu y irritación al sur del Payares, como muestra la lliteratura castellana de la época, incluyíu ‘El Quijote’. Esto ye, que la división estamental o desigualá énte la llei, base del Antigu Réxime, taba prauticamente finada n’Asturies a últimos del sieglu XVIII: en Murcia, Catalunya o Galicia yera impensable qu’un fidalgu reconocíu trabayase. N’Asturies, como fidalgu era dende’l ricu del pueblu hasta’l mendigu que pidía a la puerta de la ilesia, nun esistía esa concepción, yá que’l privilexu yelo namái cuando lo tienen unos pocos: si lo tienen toos yá nun ye privilexu, sinón derechu.
Esto nun quier dicir que la sociedá asturiana nun tuviera atravesada por diferencies sociales fonderes, que lo taba, pero eses diferencies yeren esclusivamente eso, sociales, basaes na rellación cola propiedá de los medios de producción y non en criterios xurídicos.

Capítulu VIII:
El sieglu XIX

Carbón, aceru y lliberalismu
.
La época contemporánea principial al sur de los Pirineos nel 1808 cola invasión de la Francia napoleónica, yá que supón l’aniciu del fin del Antiguu Réxime. L’entamu de la sublevación antinapoleónica en Madrid el 2 de mayo coincidió nel tiempu cola reunión ordinaria de la Xunta Xeneral que’l 25 de mayu, depués d’un golpe revolucionariu protagonizáu pol sector más radicalizáu de la Xunta, proclamó la soberanía asturiana; declaró non reconocer más rei que Fernando VII; despachó embaxadores a Inglaterra a negociar la paz cola mesma, asina como ayuda militar; y formó un exército, l’Exércitu Defensivu Asturianu, pa enfrentar la invasión. Una de les figures más sobresalientes del llevantamientu foi Álvaro Flórez Estrada, Procurador Xeneral d’Asturies naquel momentu, miembru de la pequeña nobleza somedana, empresariu, intelectual ilustráu y, años depués, ún de los grandes economistes del sieglo XIX en tol sur d’Europa. Lo esceicional de la sublevación asturiana, a diferencia de les que siguirán n’otros territorios del reinu, ye que se fai dende una institución ofical, propia del Antiguu Réxime, pero que se reinterpreta a sí mesma y basa la so llexitimidá non sólo na tradición, sinón na eleición popular. La declaración de la soberanía asturiana xustifícase pola ausencia del monarca llexítimu, Fernando VII, polo que los sublevaos entienden que la soberanía torna a Asturies hasta qu’l rei pueda recuperala.
D’esta sublevación, niciu auténticu de la revolución burguesa nel nuesu país, procede ún de los elementos simbólicos más importantes de la historia asturiana: la bandera. Foi diseñada por Xovellanos y asumida pola Xunta con variaciones pequeñes, quedando con una forma mui similar a l’actual: azul celeste cola cruz de la victoria –col alfa y la omega– n’oru, y la inscripción, nel mesmu color, ‘Asturias nunca vencida’.
Los revolucionarios asturianos van formar parte activa nes Cortes de Cádiz y nel diseñu de la Constitución del 1812. Derrotaos los franceses, cola restauración de Fernando VII y la reaición absolutista, esos lliberales van ser persiguíos y encarcelaos, hasta que nel 1820 un asturianu, l’oficial tinetense Rafael del Riego, dirixa un golpe militar qu’obliga a Fernando VII a restablecer la Constitución, anque ésta solo rexirá trés años, yá qu’ una  invasión francesa nueva restaura l’absolutismu. Mientres tol reináu de Fernando VII sucederánse les disoluciones y restituciones d’una Xunta Xeneral cada vegada más disminuida na so capacidá d’autogobierno, hasta que nel 1835 se produz la so eliminación definitiva. La Xunta cayó víctima de l’aversión de lliberales y absolutistes al mesmu tiempu: los primeros nun la queríen porque defendíen un estáu centralista y nun toleraben nenguna institución específica nos diferentes pueblos d’España, y los absolutistes tampoco porque, a pesar de ser una institución oligárquica, era electiva y representativa y, pa ellos, sospechosa d’inclinase a la subversión, ente otres coses porque munchos de los sos miembros yeren lliberales destacaos. Asina, col apoyu d’unos y otros, eliminóse el restu últimu del autogobiernu asturianu, lo que Xovellanos llamaba la Constitución histórica del Principáu, quedando a partir d’entós Asturies sometida a un centralismu cerril que reportaría consecuencies graves pal desarrollu económicu posterior.
.
La revolución burguesa que los lliberales realizaron n’España fíxose non yá al marxe, sinón en contra dafechu de los intereses de la mayoría grande de la población, llabradores y artesanos, y amás con un componente autoritariu y confesional fuerte –lliberalismu doctrinariu–. La desamortización de les propiedaes de la Ilesia católica –nacionalización y puesta en venta de los bienes, que foron adquiríos na so mayoría pola burguesía– tuvo efeutos mui negativos pa los llabradores asturianos, que nun pudieron acceder a la propiedá de la tierra por carecer de capital pa ello, y que vieron cómo los amos nuevos de la mesma pasaben a esixir el pagu de la renta en metálico y non n’especie, obligando a los arrendatarios a vender ellos mesmos la collecha, non disponiendo munches vegaes de dineru suficiente p’afrontar los pagos y enfrentándose al desallugu y/o a la miseria. Per otru llau, la supresión obligatoria de los gremios, que finaba colos derechos de los artesanos en nome de la llibertá de trabayu, tamién provocó rocees d’estos hacia un lliberalismu que, en nome de la llibertá, condenaba a les clases populares a la esclavitú. Sicasí, esta opresión nun se traduxo a lo llargo del sieglu XIX en grandes rebeliones sociales d’estos sectores, a esceición d’ un apoyu discretu al carlismu o motines esporádicos por mor de  la carestía, sinón nuna inhibición política casi total –polo demás lóxica, yá que nun teníen derechu a votu– y nel votu por pies, esto ye, la emigración masiva, de manera preferente hacia América Llatina: ente l’últimu terciu del sieglu XIX y el primeru del XX produxéronse dende Asturies más de 350.000 salides tresoceániques –que nun quier dicir 350.000 emigrantes, yá que munchos d’ellos fixeron el viaxe delles vegaes–. Cuba, México y Arxentina foron los destinos principales, auque non los únicos: EE XX., Chile, Uruguai, Colombia, Santo Domingo y un llargu etcétera tamién contaron con colonies asturianes importantes. La mayoría nun tornó, y los que lo fixeron, los indianos, aquellos que regresaron ricos y poderosos, van convertise en munchos casos nos elementos más dinámicos de la burguesía asturiana de principios del sieglu XX.
Porque’l gran cambiu qu’esperimenta Asturies nel ámbitu socioeconómicu a lo llargo del sieglu XIX va ser l’aniciu de la Revolución Industrial, mui tardía y escasa si la comparamos con Inglaterra o Francia, pero bastante notable si lo facemos con España, a esceición de Catalunya y Bizkaia. La industrialización asturiana nun va venir como la catalana o la de la mayor parte del continente, esto ye, d’una burguesía arriquecida pol comerciu y, polo tanto, con capital suficiente como pa emprender un procesu industrializador, sinón que va venir como la bizkaitarra: pola esistencia d’una riqueza mineral –fierro nel casu vascu; carbón, nel asturianu– qu’atrae capital foriatu pa la esplotación minera y metalúrxica. Carbón y aceru van ser la base de la revolución industrial asturiana, circunscrita mientres el sieglu XIX a la zona d’Uviéu, Xixón y les cuenques del Nalón y del Caudal. Pese a too, estos focos industriales van ser islles en mediu d’un mar rural: nel 1900 tovía’l 70 por cientu de la población asturiana vivía del sector primariu, frente a un 14 por cientu del secundariu y un 16 por cientu del terciariu. El desarrollu industrial viose llastráu pola ausencia d’una burguesía asturiana –que nun se va dir creando de forma significativa hasta principios del sieglo XX– y pola ausencia absoluta d’un autogobiernu que permitiese utilizar los recursos asturianos n’articular el territoriu y ameyorar les condiciones del procesu industrializador. Por poner un exemplu, el ferrocarril Llangréu-Xixón foi’l segundu más antiguu d’España (1853), pero la indispensable vía férrea que coneutara Asturies con Castilla, y polo tanto fixera realmente rentable la esplotación a gran escala del carbón y l’aceru, nun se fixo hasta’l 1884. Nes décades últimes del sieglu fadránse sentir con fuerza les reivindicaciones de los republicanos federales, que van realizar delles propuestes de Constitución asturiana, con un conteníu social mui avanzáu pa la so época –y la de nueso–.

Capítulu IX:
El sieglu XX

Carbón, aceru y revolución
Asturies entró nel sieglu XX col regalu de la derrota española na guerra contra los EE XX y la perda posterior de Cuba, lo qu’implicó la repatriación de numberosos indianos y capitales asturianos, que serviríen p’acelerar el procesu modernizador del país.
.
Nel aspeutu políticu, los primeros años del sieglu son los de la decadencia y crisis definitiva de los dos partíos, lliberales y conservadores, que constituyíen la base de la restauración monárquica del 1874. El predominiu d’estos partíos –n’Asturies, sobre manera’l conservador– descansara na rede amplia de caciques llocales qu’amañaben les eleiciones pa dar una mayoría parllamentaria artificial al partíu al que-y tocase gobernar nesi momentu. A midida qu’España vaya modernizándose, por mor del éxodu rural, el desarrollu industrial y el crecimientu de capes de población non venceyaes de manera direuta a los caciques rurales, asina como al florecimientu de corrientes nueves d’oposición sociales y polítiques, como los sindicatos y partíos obreros y republicanos, la crisis del sistema de la restauración dirá profundizándose. N’Asturies, qu’a pesar del so atrasu constituyía ún de los países económicamente más avanzaos d’España, esti procesu va dase con especial fuercia.
Trés van ser los factores políticos que n’Asturies provoquen la crisis terminal del sistema. En primer llugar, el movimientu obreru, organizáu alredor de dos grandes corrientes: la mayoritaria, formada pol binomiu PSOE-UXT, y una minoritaria pero tamién mui influyente –y mayoritaria en dos focos industriales d’importancia especial, La Felguera y Xixón– de predominiu anarquista: la CNT. Les lluches sociales d’estes décades van colocar a la clase obrera asturiana a la vanguardia del proletariáu español pola so combatividá y organización alta, lo que se va a traducir n’ésitos como que, nel 1919, los mineros asturianos sían los primeros del mundu en consiguir la xornada llaboral de siete hores nel interior de la mina. El segundu factor va ser la creación nel 1912, pol abogáu carbayón Melquíades Álvarez, del Partido Reformista, nos sos oríxenes de calter republicanu y d’izquierdes, pero que colos años viraría hacia posiciones conservadores en paralelo a la evolución de la burguesía asturiana, cada vez más asustada pol pesu del movimientu obreru. El Partido Reformista yera un partíu d’ámbitu estatal pero, si nel conxuntu d’España siempre foi un partíu minoritariu –na so época d’esplendor máximu nun superó’l 10 por cientu de los diputaos–, n’Asturies va convertise nel gran partíu de la pequeña burguesía asturiana, tanto urbana como rural, con una penetración fuerte nes clases populares, lo que lu convertirá na primer fuercia política asturiana a partir del 1918. El tercer factor serán los partíos republicanos, qu’esperimenten un cierto desarrollu a pesar de quedar reducíu ente los dos bloques anteriores, l’obreru y el reformista.
N’agostu del 1917 eses trés fuercies llanzáronse a una fuelga xeneral revolucionaria col oxetivu de cambiar el réxime, que, anque acabó en fracasu nel conxuntu d’España, n‘Asturies tuvo un siguimientu tan ampliu que namái l’exércitu pudo desaniciar una selmana depués tres una dura represión, no que supón un preludiu tráxicu de la revolución del 1934.
La crisis del sistema de la Restauración saldóse nel 1923 con un golpe d’estáu militar dirixíu pol xeneral Miguel Primo de Rivera que contó col sofitu del rei Alfonso XIII. El dictador intentó ensayar una política populista y pa ello buscó dividir el movimientu obreru ganándose a los socialistes y reprimiendo a la CNT y a los, naquel momentu, minoritarios comunistes. La collaboración socialista cola dictadura acaba nel 1928 cuando un ampliu movimientu de base de los mineros asturianos provoca un descensu importante de l’afiliación al sindicatu socialista SOMA-UXT en beneficiu del nuevu SUMA, formáu por cenetistes y comunistes. El movimientu foi de tal magnitú qu’obligó al PSOE estatal a romper col dictador, siendo ési ún de los factores que contribuyeron a la so cayida en xineru del 1930.
Nel 1931 llegó la II República en medio del entusiasmu popular. Les eleiciones constituyentes de xunu del 1931 trayeron n’Asturies un resultáu llamativu, yá que tolos escaños foron pa la izquierda y la estrema izquierda énte la inhibición de los reformistes y la derecha. El primer bieniu republicanu (1931-33) provocó un descontentun profundo ente la base social de les izquierdes polo tímido de les reformes emprendíes, lo que llevó a que nes eleiciones del 1933 la victoria fora pal centru y les dereches, incluyida Asturies, onde se presentaron en coalición. El mieu a que la derecha usara los resortes llegales p’avanzar hacia una dictadura fascista o de tipo fascistizante, como ocurrió nesos mesmos años n’Austria y Alemaña, asina como la voluntá de les organizaciones obreres de desencadenar la revolución social, foi l’orixe de les alliances obreres, organismos xunitarios de socialistes, comunistes y anarquistes, corrientes que namái n’Asturies llegaron a englobar al conxunto de la clase obrera. Asina, cuando n’ochobre del 1934 el PSOE da la consigna de la fuelga xeneral revolucionaria pola entrada nel Gobiernu de dellos ministros de la mui derechista CEDA, ésta sólo va triunfar n’Asturies, adoptando amás la forma d’una revolución social de tipu conseyista na que los obreros, al grito de UHP (Unión d’Hermanos Proletarios), van conquistar el poder mientres dos selmanes y a aguantar la ofensiva del exércitu que, una vez derrotada la fuelga en toda España, va poder concentrar tol so aparatu represivu contra los revolucionarios asturianos, que s’acabarán rindiendo ante la imposibilidá de trunfu. Casi 2.000 muertos n’Asturies y casi 30.000 deteníos va ser el resultáu del procesu revolucionariu, el más importante d’Europa occidental dende la Comuna de París del 1871.
Los 30.000 presos pola Revolución d’ochobre del 1934 van ser un factor fundamental pa esplicar el procesu de reagrupación de les izquierdes nel Frente Popular, que gana les eleiciones de febreru del 1936 n’España y n’Asturies. En xunetu d’esi mesmu añu, un intentu de golpe militar de la ultraderecha desencadena la Guerra Civil del 1936-1939. Asturies, cola esceición de la capital, permaneció fiel a la República y en Xixón formóse un gobiernu autónomu, el Conseyu Interprovincial d’Asturies y Lleón, presidíu pol socialista Belarmino Tomás. N’agostu del 1937, coles tropes franquistes en plena ofensiva en tol norte peninsular, esi conseyu interprovincial declaróse soberanu nuna operación un tanto similar a la de la Xunta Xeneral del 1808. N’ochobre d’esi mesmu añu, l’exércitu franquista terminaba de conquistar Asturies y, con ello, la Guerra Civil terminaba na zona norte. La represión, non.
Dende ochobre del 1937 hasta finales de los años 40 van aplicase n’Asturies la política de brutal represión del bandu republicano por parte del réxime nuevu. Ésta, si bien foi común a toda España, tuvo n’Asturies una saña especial pola importancia que nel nuesu país teníen les organizaciones obreres. Anque tovía nun ye posible cuantificala, por mor del silenciu qu’hubo mientres la dictadura y depués de la mesma, pue estimase nun mínimu de 5.000 persones los afeutaos, anque los estudios recientes tienden a elevar de forma considerable esa cifra, que podría tar en el triple. Xunto a los muertos na guerra y los miles de exiliados, los poco más de 800.000 habitantes que tenía Asturies naquella época quedaron reducíos de forma sensible.
La dificilísima situación económica na que quedó Asturies depués de la guerra namái principió a meyorar de manera leve dende los años 50. A finales d’esa década produzse la creación de la empresa siderúrxica ENSIDESA, que convertirá a Avilés y a la so redolada nel otru gran focu industrial d’Asturies, a añadir a los de Xixón y Les Cuenques, yá qu’Uviéu va pasar a ser un centru de servicios pola so capitalidá alministrativa. La depresión económica de finales d’esa década provocó la deserción empresarial de la mayor parte de la burguesía minera; l’Estáu franquista nacionalizó les mines, polo que pasó a convertise nel principal empresariu d’Asturies. Esa recesión económica provocó una segunda gran fola migratoria, non tan fuerte como la de finales del XIX, pero que va llevar a miles d’asturianos a otros países europeos –Francia, Bélxica, Suiza y República Federal Alemana, de forma principal–, y en muncha menor midida otra vez a América Latina, sobre manera a Venezuela, y inclusive a Australia.
Nel 1962, les condiciones llaborales dures de los mineros, xuníes a l’aversión a la dictadura, desencadenaron una gran fuelga de trés meses de duración qu’acabó en victoria completa de los mineros, convirtiéndose nel primer trunfu del movimientu obreru dende la Guerra Civil. Nos años sucesivos va haber más fuelgues mineres, con distinta suerte, y les d’otros sectores. Los principales motores d’estes reivindicaciones van ser el sindicatu clandestín Comisiones Obreres (CC OO) y el Partido Comunista de España (PCE). La llucha de los trabayadores, asina como la radicalización creciente de los estudiantes, van ser los dos factores fundamentales de la oposición a la dictadura. El desarrollu económicu d’esa década va facer qu’Asturies pase de ser tierra d’emigrantes a selo d’inmigrantes, y a ocupar ún de los primeros puestos d’España nos indicadores económicos.
El dictador Francisco Franco fina nel 1975 y el so herederu Juan Carlos de Borbón sucédelu. Nos años siguientes va haber un procesu de cambios conocíu por Transición y que consistió básicamente nel pautu ente los sectores reformistes del aparatu franquista y les fuercies principales de la oposición pa llegar a un réxime descentralizáu y de monarquía parllamentaria nel que se reconocieran los derechos individuales a cambio de renunciar a tresformaciones sociales profundes y a depurar y esclariar les responsabilidaes contrayíes polos aparatos represivos de la dictadura. Resultáu d’esti pautu foi la Constitución del 1978, sometida a referéndum y que n’Asturies foi aprobada por mayoría amplia.
.
Resultáu del marcu constitucional nuevu foi’l procesu autonómicu, nel que los partíos mayoritarios (PSOE, UCD,  AP y PCE) optaron por meter a Asturies na llamada vía llenta a l’autonomía, negando-y el calter de nacionalidá histórica que se reconoció a otros territorios. Les primeres eleiciones autonómiques, celebraes nel 1983, dieron la mayoría absoluta a la FSA-PSOE, que dende entonces vien gobernando’l Principáu con dos paréntesis: el periodu 1995-99, nel que’l Gobiernu recayó nel Partido Popular (PP), y yá nel sieglu XXI, en concreto nel 2011, con un añu de mandatu de Foro Asturias Ciudadano (FAC), partíu que convocaría eleiciones anticipaes a primeros del 2012 al gobernar en minoría y nun poder sacar alantre los presupuestos. Mientres les dos décades últimes del sieglu, los axentes principales de movilización social, que gocen amás d’una influencia considerable nos dos partíos mayoritarios de la izquierda asturiana, foron los sindicatos UXT y CC OO, anque la crisis industrial tiende a desgastar la so base social tradicional. Otros movimientos sociales d’importancia, anque coxunturales, foi’l movimientu anti-OTAN, nos años centrales de la década de los 80, que finó cola so derrota nel referéndum del 1986, o’l movimientu ecoloxista, que medra pola creciente industria d’actividaes económiques depredadores, como la producción enerxética o la especulación inmobiliaria. Nos años 90, gana especial fuercia’l movimientu pola oficialidá de la llingua asturiana, convirtiéndose, tres los sindicatos, nel únicu que ye quien a caltener una continuidá organizativa y capacidá movilizadora, anque tovía insuficiente pa obligar a la clase política a da-y status oficial al idioma del país.
Mientres los años 80 y 90 produzse la crisis global, agravada pol ingresu d’España na CEE nel 1986, de tolos sectores productivos que foron la base del desarrollu económicu asturianu nos cien años precedentes: ganadería, siderurxa y minería carbonífera. El sector primariu pasó en trenta años d’ocupar a casi’l 30 por cientu de la población activa a menos del 10 por cientu. La minería, que nel 1958 emplegaba a 50.000 asturianos, quedaba reducida a 10.000 cuarenta años depués. La falta d’alternatives productives por parte de la clase política asturiana frente a la demanda ciudadana, reflexada na masiva fuelga xeneral d’ochobre del 1991, saldóse con una disminución drástica del emplegu nos sectores tradicionales, ensin qu’otros nuevos vinieran a cubrir esi espaciu, yá que los fondos europeos destinaos a xenerar alternatives invirtiéronse en caltener una voladura controlada del modelu anterior –les famoses prexubilaciones– y en construyir infraestructures que sirvieran p’atrayer inversiones privaes, ensin munchu ésitu. Nesi contestu, la emigración convirtióse una vegada más na salida única posible pa bona parte de la población, sobre manera pa les xeneraciones nueves, les meyor formaes de la historia d’Asturies, qu’acaben trabayando en tierra estraña.