• TPA: Momentu de mazcaráes

Calendariu asturianu de mazcaraes d’iviernu.
Ver en pestañes nueves, dellos enllaces, pa saber qué faen!

Los Guirrios o Sidros, ( del llatín «guerrire«, saltar) son unos personaxes típicos nes feches del Antroxu. Los Guirrios (Guirrios Llangréu y Samartín del Rei Aureliu / Sidros Siero) diben vistíos de blanco, con polaines de pañu negru, faxa colorada na cintura y el pechu (tamién podía ser verde o azul), y un cinchu de cueru tremáu de cascabeles y campanines, pa facer ruíu al movese, y sobremanera una llarga piértiga cola que pegaben grandes blincos pel aire y que-yos permitía desplazase aína y saltar percima muries y sebes. Diben con un gorru llargu y picudu, cubiertu de pelleyos d’oveya, y portaben una mázcara, les más de les veces tamién colorada.

Los Aguilanderos   16 Avientu, 2008 por Asturies.com

El ciclu de fiestes de la Navidá entemécese col aniciu de les del ciclu d’Antroxu, esto vese bien a les clares na tradición del Aguilandu, cuando mozos y moces salíen per pueblos, barrios y llugares a pidir l’aguilandu de Navidá en toles cases, munches veces vestíos pa la ocasión y mazcaráos, armando xaréu con instrumentos musicales al estilu de zamploñes, panderos, rabeles y de xemes en cuando, sobremanera en villes urbanes, tamién gaites, guitarres, y bandurries.

Cantaben villaucicos y tocaben, dicíen coples, parábense en cada caseriu, y nes ciudaes andaben toles cais y subiense a los pisos. La xente dába-yos dalguna perruca (los célebres riales), o tamién coses de comer, pa n’acabando entamar los aguilanderos una gran llacuada / merienda…

«Nun somos d’aborrecer
que cualquier cosa valnos
tocinucu, rabalucos
y riales de a ochu y de a cuartu»

«Denos l´aguilandu
señora por Dios
qu´equí tamos cuatru
y bailaremos dos»

Dellos investigadores afirmen que nel orixen lo de dir a Andar l’Aguilandu faciase namás que’l día San Silvestre (31 d’Avientu) y la segunda el día Reis, pero col tiempu xeneralizose a tolos dies de la Navidá. Los mazcaritos teníen dellos nomes…Sidros en Nava, Bardancos en Casu, en Llena Guirrios y Zamarrones, Zancudos en Quirós, y Zaparrastros n’Aller.

Estes alegres recielles de rapacinos podíen dixebrase en grupos, en munches zones había unos que yeren los «cantores» y otros los «rabicos». Sábese que en Candás los aguilanderos separtábense en tres grupos: los mayorales, los medianos, y los pequeños, toos ellos con una función concreta. La manera actuar de los aguilanderos ye mui asemeyada en tol Noroeste Penínsular.. Galicia, Asturies, y bon cachu de Lleón, quedando ñicios d’estos vezos en llugares de la Estremadura…

Munches veces la contabilidá del aguilando facíase con unes marques a cuchiellu nun de los palos de los rapazos. L’aguilandu tenía de ganase con canciones y bailes, al son de la música y de los palos, y tamién bailando y pegando pilos col palu o la piértiga que llevaben.

«Que baixen los chorizos
e las llunganizas
que baixen con priesa.

Nun nus dean castañas
nueces nin avellanas
qu´ente caballeiros
é cousa ordinaria

«Deanos l´aguilandu
señora casada
güvos y tocín,
llonganiza asada»

Allá arriba n´aquel monte
hai una perra cagando
pa los amos d´esta casa
que nun nos dan l´aguilandu.

Aporta l’Antroxu modernu, que trai cinco díes de mázcares y diversión

Na semeya, ‘Mazcarada d’Uviéu’ (1928) d’Evaristo Valle.

Folixa, mázcares y gastronomía axúntense nestos cinco díes próximos en toda Asturies na celebración del Antroxu. Esta festividá asturiana entamaba nel pasáu col solsticiu d’iviernu y agora resúmese a les xornaes previes al Miércoles de Ceniza, primer día de la Cuaresma.

Los antroxos de Xixón y Avilés son los más importantes en cuantes a programa institucional y participación. Música y delles actividaes más orientaes a asemeyase a los carnavales de Rio de Janeiro, Tenerife, Las Palmas o Cádiz qu’a otra cosa, protagonicen estes xornaes na que la xente participa antroxándose, anque con mázcares lloñe de la tradición.

El sábadu los focos van p’Avilés, onde se celebra’l XXXIII Descensu Internacional y Fluvial de Galiana a partir de les 18.30 hores pal que tán inscritos más de 23 artiluxos. Una gran cantidá de chigres de la ciudá antróxense pa estos díes pa participar nun concursu entamáu polos comerciantes de la ciudá y la xente sal a la cai coles sos mázcares pa pasar una xornada de folixa.

El domingu ye’l Domingu’l Gordu, que na tradición yera celebráu polos homes y que nel Antroxu modernu resúmese a les actividaes programaes polos conceyos. Mentes, la xornada siguiente ye’l día grande, el Llunes d’Antroxu, cola celebración d’un desfile peles cais de les villes –ye especialmente espectacular el de Xixón– y l’allargue de la folixa hasta bien entrada la madrugada. Ésti ye’l día más desenfadáu del añu y nel que la xente tien más costume por antroxase, sobre manera la más mozo.

El xolgoriu del Antroxu termina’l Martes d’Antroxu col Entierru la Sardina –n’Avilés celébrase’l miércoles–, cuando un conxuntu de plañideres acompañen a la sardina, que representa a don Carnal, nun cortexu fúnebre tres la so muerte.

Ye’l final del Antroxu y l’entamu de la Cuaresma col Miércoles de Ceniza; de la vixilia y de la preparación pa la Selmana Santa. Por ello, ye nesta xornada cuando se disfrutaba de la comida y la bébora n’escesu, n’especial la carne. Güei, d’esta tradición, queda’l menú d’Antroxu tan solicitáu nos restoranes asturianos y na que’l gochu, al ser época de matanza, ye protagonista. Asina, el que venden los establecimientos xixoneses ta compuestu por un pote asturianu, picadiellu y los postres típicos d’esta época, como los frixuelos y les picatostes.

Celebración en Cuaresma

En delles ciudaes d’Asturies les festividaes d’Antroxu celébrense fuera de les feches tradicionales, en plena Cuaresma, como asocende en Mieres del Camín, Uviéu o La Pola Ḷḷena. Nesti casu respuende a intereses de la hostelería d’eses villes más qu’a otra cosa, dexando pa prau una tradición perguapa yá de por sí alloñada del so espíritu ainicial por mor de los tiempos modernos.

Les persones que quieran conocer de primer mano l’orixe del Antroxu asturianu y les sos peculiaridaes pueden disfrutar de la serie realizada por Xurde Morán na seición ‘Ye tiempu de…’ d’Asturies.com na que nun falta un detalle d’esta folixa, asina como otru de Pilar Sánchez Vicente, güei distinguida como ‘Comadre de Oro Especial’, entituláu ‘L’Antroxu’. Los más mozos tamién pueden averase a esta celebración col reportaxe de la nuesa estaya infantil ‘A la Gueta los Suaños’.

¿A quién nun-y presta amarutase? L’Antroxu son feches pa ello; pa divertise y comer dulces típicos d’esti tiempu. Pero, ¿foi siempre l’Antroxu tal y como lu conocemos agora? Non, anguaño la celebración ta lloñe de la tradición asturiana.
¿Cuándo principia l’Antroxu? Cuando llega’l solsticiu d’iviernu (alredor del 21 d’avientu), momentu nel que la nueche ye más llarga y el día, más curtiu. La fecha tradicional de celebración d’esti solsticiu ye’l 25 d’avientu por mor de los calendarios antiguos.
Pero, ¿nun cae siempre pa febreru o marzu? Hai que diferenciar ente l’Antroxu tradicional y el modernu. Ésti últimu, por mor del cristianismu, arrequéxase a los díes previos al Miércoles de Ceniza, xornada que marca l’aniciu de la Cuaresma, periodu de 40 díes de reflexón enantes de la Selmana Santa.
¿Y cómo se celebraba l’Antroxu? El solsticiu yera’l momentu de mayor puxu de les tiniebles y la xente venceyábalo a la llegada de seres del otru mundu, demonios y difuntos, polo que s’amazcaritaben y baillaben p’atrayer, de manera positiva, la so maxa.
¿De qué se disfrazaben? La xente antroxábase de personaxes que representen la lluz –nomaos tamién los guapos– y la escuridá. Salíen pidiendo l’aguilandu per toles cases del pueblu, onde la xente esperaba a los mozos con comida, dulces y oruxu. Les feches más habituales pa celebrar les nomaes mazcaraes d’iviernu yeren díes señalaos, como Nuechebona, Navidá, Añu Nuevu o Reis, anque éstes allargábanse per tola estación, inclusive más alla del Miércoles de Ceniza.
¿Tovía hai mazcaraes tradicionales? Sí, hai dellos pueblos que caltienen la tradición. Asina, atopamos Los Sidros y La Comedia (Valdesoto, Siero), El Guirria (San Xuan de Beleño, Ponga), Os Reises del Valledor (Ayande), Os Reises de Tormaleo (Ibias), Os Aguilandeiros de Xedré (Cangas del Narcea) y Los Aguilanderos de La Puela (Ayande). Nel pasáu hebo munches más mazcaraes.
¿Por qué se perdieron? Al cristianismu nunca-y prestaron esti tipu de celebraciones paganes, pero al nun ser quien a desaniciales lo que fixo foi adaptales. Col tiempu, l’Antroxu redúxose a los díes previos a la Cuaresma, periodu de reflexón nel que nun se podía comer carne, polo que la Ilesia daba permisu los díes previos al Miércoles de Ceniza pa la fiesta y los escesos. La prohibición de la celebración del Antroxu por parte de la dictadura franquista llevó a la práutica muerte d’esta folixa, que se recuperó tres la llegada de la Democracia, anque ensin tener en cuenta la tradición.
Entós, ¿cómo se celebra anguaño l’Antroxu? Los Conceyos principiaron a organizar la fiesta, pero tomando como referentes carnavales como los de Rio de Janeiro, en Brasil, o Tenerife. Ello llevó a formar ente la xente una idea equivocada de lo que ye l’Antroxu qu’acabo cuayando ente la sociedá. Sicasí, tovía hai coleutivos de xente que puxen por recuperar l’Antroxu tradicional asturianu.
¿Cuándo da entamu? L’Antroxu asturianu modernu principia con Les Comadres, la tarde-nueche del xueves enantes del Miércoles de Ceniza, una xornada de reunión de muyeres. A esta celebración siguen-y cinco díes de folixa nel que destaquen el Domingu’l Gordu, el Llunes d’Antroxu y el Martes d’Antroxu.
¿Qué ye lo que se come estos díes?  Carne, principalemente de gochu, y dulces típicos d’estes feches, como los frixuelos y les picatostes.
¿Cómo puedo festexalo yo? Busca un disfraz prestosu y sal a la cai a disfrutar xunto colos tos amigos y familiares, pero nun escaezas que, con casi toda seguridá, nel to pueblu hay o hebo una mazcarada tradicional. Infórmate y puxa por ella.