Asturies y Madrid encabecen la desigualdá salarial ente homes y muyeres. El sector con mayor fienda de xéneru ye’l d’entidaes financieres y aseguradores. La Voz / Institutu Asturianu de la Muyer / Nortes.me
L’asociación de Técnicos del Ministeriu de Facienda (Gestha) asitien la fienda salarial ente homes y muyeres en 5.156 euros en 2024, un datu que se dispara hasta los 10.017 euros nel colectivu de mayores de 65 años, y envaloren que, por comunidaes autónomes, la cuantía más elevada rexístrase n’Asturies.
Gestha publicó esti vienres la décima edición del so informe ‘Fienda salarial, suelu pegañosu y techu de cristal’, nel que constata que les muyeres precisaríen ganar un 23,2 % más pa igualar el sueldu de los homes, un desfase 0,7 puntos inferior al de 2023.
Entá asina, la fienda de 2024 ye 64 euros mayor a la de 2023 debíu a la medría xeneral de los salarios y a que les muyeres son mayoría ente los salarios más baxos.
L’analís por franxa d’edá revela que la fienda salarial pasa del 47,1 % ente los menores de 18 años al 21 % ente los 18 y 25 años y el 11,3 % ente los 26 y los 35 años, una etapa marcada pola progresión profesional de les muyeres “gracies a la so preparación y cualificación”.
A partir d’ende, la fienda crez hasta’l 22,3 % nel colectivu d’ente 36 y 45 años, cuando se concentra la crianza de fíos, y sigue aumentando -27,2 % ente los 46 y los 55 años y 28,7 % ente los 56 y los 65 años- hasta disparase al 55,6 % ente los mayores de 65 años.
Por comunidaes autónomes, les mayores fiendes salariales danse n’Asturies (29,5 %) y Madrid (29,4 %) y les menores, en Canaries (10,5 %) y Estremadura (18,2 %).
L’informe tamién apunta que’l sector con mayor fienda ye’l d’entidaes financieres y aseguradores (16.614 euros) y el menor, el de la construcción (1.453 euros).
El 22 de febreru celebra’l Día de la Igualdá Salarial. Esti día recuérdanos que muyeres y homes nun ganen lo mesmo pola realización del mesmu trabayu o de trabayos d’igual valor. La diferencia salarial ente muyeres y homes ye lo que se denomina Fienda Salarial de Xéneru.
Faise necesariu dar visibilidá a la esistencia d’esta fienda, yá que pon de manifiestu la pervivencia de desigualdaes llaborales y sociales qu’afecten a les persones en función del so sexu. Amás, la fienda salarial impon a les muyeres consecuencies económiques y sociales inxustes tantu a lo llargo de la so vida llaboral, como una vegada qu’ésta termina, al influyir sobro’l tipu y la cuantía de les pensiones y prestaciones a les que pueden aportar.
Nesti contestu, l’Institutu Asturianu de la Muyer publica un cartelu divulgativu sobro la fienda salarial n’Asturies. P’ampliar información, ta disponible’l dípticu que, n’ocasión d’esta fecha, vien publicándose añalmente. .Tamién ye posible consultar el capítulu sobro «Salarios ya ingresos» na publicación web «Asturianes en Cifres».
