- Alborecemos col cielu poco nuboso o escampláu y una vegada más con borrín y nublina na fastera central asturiana y no fonderu los valles con unes temperatures que tan alrodiu de los 13ºC, rexistrándose nel puirtu Payares 14,2ºC onde yá va entrando la masa cálida que mos va afeutar güei.
- Güei vamos tener el cielu poco nuboso o escampláu una vegada que se dixebren les nublines del alborecer con unes temperatures n’ascensu bultable, sobre too nel interior y más conteniu na costa onde puen surdir nublines d’advención a partir del mediudía. L’aie sedrá sele ya variable con brises na costa.
- El prósimu riscar vamos pasar calor abondu con unes temperatures que sedrá difícil que baxen de los 20ºC en delles zones d’Asturies polo que falariamos de nueche tropical. Durante’l día resfrescará dalgo anque seguiremos perriba de los 20ºC nidiamente y nun sedrá hasta’l riscar del sábadu cuando se normalicen. Pel día aumentará la nubosidá y de tarde podríamos tener dalgo de truena sobre too na fastera más oriental d’Asturies.
- El sábadu tendremos el cielu nuboso con nubosidá baxa que malpenes mos dexará dalgo d’orpín puntualmente y el domingu’l descensu de les temperatures sedrá bultable con unes másimes 15ºC más baxes que les de güei nel interior asturianu ya con precipitaciones febles en forma d’orpín durante tol día.
